Prezıdent: Ýádemiz ben isimiz úshin jaýap bere bilýimiz kerek

ASTANA. KAZINFORM — Memlekettik organdar óz jumysyn jetildirý úshin azamattardyń ótinishterin taldaýǵa kóbirek nazar aýdarýǵa tıis. Bul týraly Qazaqstan halqyna Joldaýyn jarııalaý kezinde Memleket basshysy Qasym-Jomart Toqaev aıtty.

«Memlekettik basqarý isiniń tıimdiligin barynsha arttyrý kerek. Men «Halyq únine qulaq asatyn memleket» tujyrymdamasyn usynǵaly bes jyldan astam ýaqyt ótti. Osy ýaqyt ishinde qoǵam men bılik qurylymdary arasyndaǵy qarym-qatynas mádenıetin ózgerte aldyq. Pikir bildirýdiń birqatar tıimdi tetigi jáne túrli dıalog alańdary paıda boldy. Memlekettik qyzmetshilerdiń azamattarmen tikeleı sóılesýi qalypty jaǵdaıǵa aınaldy. Bul tujyrymdama memlekettik qyzmetshiler minez-qulqynyń jańa modelin qalyptastyrdy. Olar jaýapkershilikpen, proaktıvti, ashyq jáne tıimdi jumys isteı bastady. Degenmen, memleket pen qoǵam arasyndaǵy dıalogtyń sapasyn odan ári arttyra túsý úshin bárimiz adal ári ádil bolýymyz, tek zań aıasynda áreket etýimiz, bergen ýádemiz ben isimiz úshin jaýap bere bilýimiz kerek», - dedi Qasym-Jomart Toqaev.

Prezıdent memlekettik organdardyń jumysyn jetildirýge qatysty tapsyrma berdi.

«Biz talqylanyp jatqan máselelerdiń mán-jaıyn bile bermeıtin, tym asyra silteýge beıim turatyn popýlısterdiń qoǵamdaǵy keıbir bastamalardy ilip alyp, óz múddesine buryp áketetinin kórip júrmiz. Munyń demokratııaǵa esh qatysy joq. Ótinishterdi qaraýǵa qatysty jumystyń biryńǵaı ekojúıesi qalyptasa bastaǵany óte mańyzdy. Bul júıe halyqtyń qajettiligi men talap-tilegin naqty bilip otyrýǵa múmkindik beredi. Memlekettik organdar óz jumysyn jetildirý úshin azamattardyń ótinishterin taldaýǵa kóbirek nazar aýdarýǵa tıis», - dedi Memleket basshysy.