Prezıdent belgilep bergen mindetter ekonomıkalyq ósýdi qamtamasyz etýge tyń serpin beredi – Áshimbaev
ASTANA. KAZINFORM – Parlament Senatynyń tóraǵasy Máýlen Áshimbaev Qazaqstan Prezıdenti Qasym-Jomart Toqaevtyń otandyq bıznes ókilderimen kezdesýinde aıtqan ustanymdaryna qatysty pikir bildirdi.
- Búgin Prezıdentimiz Qasym-Jomart Kemeluly Toqaev otandyq bıznes ókilderimen kezdesip, qazirgi jahandyq ekonomıkalyq ózgerister jaǵdaıynda el aldynda turǵan negizgi mindetterdi belgilep berdi. Memleket basshysy atap ótkendeı, Qazaqstan dástúrli tásilderdi qaıta qaraýdy jáne eskirgen stereotıpterden bas tartýdy talap etetin jańa dáýirge qadam basty. Osy oraıda ekonomıkany nyǵaıtý arqyly elimizdiń óńirdegi kóshbasshylyq rólin saqtaý strategııalyq mindet retinde aıqyndaldy. Sondaı-aq kezdesýde iri ınfraqurylymdyq jáne ónerkásiptik jobalar, tsıfrlandyrý jáne jasandy ıntellekt, kólik jáne logıstıka salalary ekonomıkany damytýdyń basym baǵyttaryna aınalýǵa tıis ekeni aıtyldy. Osyǵan baılanysty Úkimetke shaǵyn jáne orta bıznesti qoldaýdy únemi nazarda ustaý mindeti júkteldi, - dep atap ótti Senat tóraǵasy.
Senat tóraǵasy salyq júıesindegi tártipti kúsheıtip, bıýdjet kirisin arttyratyn ońtaıly sheshim qabyldaýǵa basa mán beriletinin aıtyp, bul jumysqa Senat depýtattary da úles qosatynyn aıtty.
Prezıdentimiz qoǵamda qyzý talqylanǵan qosymsha qun salyǵynyń mólsherlemesine qatysty máselege de erekshe toqtaldy. Memleket basshysy bul bastama jan-jaqty pysyqtalýy kerek ekenin aıryqsha atap ótti. Іs-sharada aıtylǵandaı, qosymsha qun salyǵy ártúrli sala úshin muqııat saralanýǵa jáne onyń joǵarǵy shegi tym joǵary bolmaýǵa tıis. Osy máselege baılanysty túpkilikti sheshim bilikti sarapshylar men kásipkerlerdiń jáne depýtattardyń pikirleri eskerile otyryp qabyldanatyn boldy. Sondyqtan aldaǵy ýaqytta bızneske qolaıly jaǵdaı jasaıtyn, sonymen birge salyq júıesindegi tártipti kúsheıtip, bıýdjet kirisin arttyratyn ońtaıly sheshim qabyldaýǵa basa mán beriledi. Bul jumysqa Senat depýtattary da óz úlesin qosady, - dedi ol.
Áshimbaev ekonomıkany jańǵyrtý jolynda bank sektorynyń róli asa mańyzdy ekenin aıtty.
- Ekonomıkany jańǵyrtý jolynda bank sektorynyń róli asa mańyzdy. Sol sebepti, Memleket basshysy qarjy ınstıtýttaryn naqty sektordy damytýǵa ınvestıtsııa salýǵa, nesıeleýdiń jańa tetikterin engizýge jáne kásipkerlerdi qoldaýǵa shaqyrdy. Prezıdentimiz belgilep bergen mindetterdi iske asyrý Qazaqstanǵa óńirdegi kóshbasshylyq rólin saqtaýǵa jáne nyǵaıtýǵa, ornyqty ekonomıkalyq ósýdi qamtamasyz etýge, sondaı-aq, otandyq kásipkerlikti damytý úshin qolaıly jaǵdaılar jasaýǵa tyń serpin beretini anyq. Sondyqtan Senat atalǵan bastamalardy zańnamalyq qamtamasyz etý úshin belsendi jumysyn jalǵastyra beredi. Aldaǵy ýaqytta memleket pen bıznestiń seriktestigi odan ári nyǵaıyp, ekonomıkany jańǵyrtý jolyndaǵy birlesken kúsh-jiger eldiń órkendeýine oń áserin tıgizedi dep senemiz, - dedi Máýlen Áshimbaev.
Osyǵan deıin Máýlen Áshimbaev Senattyń 2025 jyldaǵy negizgi mindetterin atady.