Prezıdent belgili jazýshy Tólen Ábdikke jedelhat joldady

ASTANA. KAZINFORM - Memleket basshysy Qasym-Jomart Toqaev Qazaqstannyń halyq jazýshysy, dramatýrg, qoǵam qaıratkeri Tólen Ábdikke «Egemen Qazaqstan» gazetinde jarııalanǵan suhbatyna oraı jedelhat joldady.

Bul týraly Aqordanyń baspasóz qyzmeti habarlady. 

– «Egemen Qazaqstan» gazetine bergen suhbatyńyzdy muqııat oqyp shyqtym. Ózekti oı-tolǵamdaryńyz arqyly ult rýhanııaty úshin qundy dúnıeler aıtylǵan. Tól ádebıetimizdiń damý kókjıegine qatysty syn-pikirlerińiz ben jas býynǵa qarata aıtqan aqyl-keńesterińiz oryndy dep sanaımyn. Shyn máninde, jahandy jaılaǵan qazirgideı qubylmaly zamanda jazýshylar qaýymy kórkem týyndylary arqyly ádildik, jaqsylyq jáne adamdyq qundylyqtaryn keńinen dáriptegeni jón. Bul elimizdiń keleshegi úshin óte mańyzdy. Qalamyńyz qarymdy bolsyn! Sizge myqty densaýlyq, baq-bereke jáne tolaıym tabys tileımin! – delingen jedelhatta.

Osyǵan deıin Qasym-Jomart Toqaev Vladımır Pýtındi Qazaqstan-Reseı shekarasy týraly shartqa 20 jyl tolýymen quttyqtady.