Prezıdent Belgııalyqtar Korolimen jáne Patshaıymymen keńeıtilgen quramda kelissóz júrgizdi

Aqordada ótken kelissóz barysynda Prezıdent Qazaqstan men Ortalyq Azııaǵa tarıhta tuńǵysh ret memlekettik saparmen kelgen Belgııalyqtar Koroline jáne Patshaıymyna iltıpat bildirdi.

– Osy tarıhı sátte Sizdermen júzdesip, memleketterimiz arasyndaǵy berik dostyqty atap ótý – men úshin zor mártebe. Asa mártebeli Korol Fılıpp, halqyńyzǵa qaltqysyz qyzmetińizdi joǵary baǵalaımyz. Ciz Koroldik bıligine kelgeli elińiz órkendep, álemdik arenadaǵy laıyqty ornyn bekite tústi. Halqyńyzǵa adaldyǵyńyz jáne Belgııany mekendeıtin túrli qaýymdar arasyndaǵy ózara túsinistikti nyǵaıtý jolyndaǵy tabandy eńbegińiz Tájdiń el birligin saqtaýdaǵy rólin aıqyndaı túsedi, – dedi Qasym-Jomart Toqaev.

Óz sózinde Prezıdent «Birligimiz – áralýandyqta» degen qaǵıdatqa aıryqsha mán beretinin, árbir azamattyń keleshek úshin atsalysqanyn qalaıtynyn atap ótti.

– Kóp jyldan beri kásipkerlikti, bilim men ınnovatsııany damytýǵa erekshe kúsh salyp kelesiz. Bul – shyn máninde úlgi tutarlyq izgi ister. Korol áýletiniń Belgııa bıznesine udaıy qoldaý kórsetýi sheksiz qurmetke laıyq. Asa mártebeli Patshaıym Matılda, Siz bul sapardyń mán-mazmunyn arttyryp, shyraıyn keltirdińiz. Sizdiń balalardy qorǵaý, bilim berý, adamnyń qadir-qasıetin qurmetteý máselelerine kelgende, erekshe janashyrlyǵyńyz ben qamqorlyǵyńyzǵa tántimiz. Bul ıgi murattar azamattarymyzdy shyn máninde súısintedi, – dedi Memleket basshysy.

Osyǵan deıin Qasym-Jomart Toqaev Belgııa – Qazaqstannyń Eýropadaǵy senimdi seriktesi ekenin aıtqan bolatyn.