Prezıdent Beket ata Myrzaǵululynyń 275 jyldyq mereıtoıyna quttyqtaý joldady
ASTANA. KAZINFORM — Memleket basshysy óz quttyqtaýynda Beket ata eline tutqa, jurtyna pana bolǵan tuǵyrly tulǵalarymyzdyń biri bolǵanyn atap ótti.
Mańǵystaý oblysy ákiminiń baspasóz qyzmetiniń málimetinshe, Mańǵystaý oblysynyń Tobyqty jerinde Beket ata Myrzaǵululynyń 275 jyldyǵy men onyń rýhanı ustazy Shopan atanyń rýhyna arnalǵan birqatar shara uıymdastyryldy. Eki kúnge jalǵasqan aýqymdy mereıtoıǵa elimizdiń túkpir-túkpirinen jáne alys-jaqyn shetelden 10 myńnan astam qonaq jınaldy.
Memleket basshysy Qasym-Jomart Toqaev mereıtoıǵa quttyqtaý hat joldap, Beket atanyń el rýhanııatyndaǵy ornyna toqtaldy. Prezıdenttiń quttyqtaýyn aımaq basshysy Nurdáýlet Qılybaı halyqqa oqyp berdi.
— Beket Myrzaǵululy — eline tutqa, jurtyna pana bolǵan tuǵyrly tulǵalarymyzdyń biri. Ol búkil ǵumyryn halqynyń dúnıe tanymyn baıytýǵa arnap, aǵartýshylyqpen aınalysty. Beket ata kúlli qazaqqa jáne baýyrlas elderge ǵulama oıshyl, aty ańyzǵa aınalǵan áýlıe retinde tanyldy. Meniń tapsyrmammen, Oǵylandydaǵy jerasty meshitin jáne osy aımaqtaǵy basqa da tarıhı nysandardy ıÝNESKO-nyń Búkilálemdik muralar tizimine qosý úshin naqty jumys atqarylyp jatyr. Jurtyn izgilikke úndegen abyzdyń bolmysyn bıiktete túsetin mádenı-rýhanı qundylyq ulttyq uǵymyzdyń baǵa jetpes baılyǵy sanalady. Ony saqtaý, urpaqqa mıras etý — paryz. Barshańyzǵa amandyq, baq-bereke tileımin, — delingen quttyqtaýda.
Іs-sharaǵa Qazaqstan Respýblıkasy Parlamentiniń depýtattary, zııaly qaýym ókilderi, qoǵam jáne mádenıet qaıratkerleri, jastar sondaı-aq ózge de shaqyrylǵan qonaqtar qatysty. Mereıtoı aıasynda Shopan ata men Beket ata meshitine zııarat jasaldy.
Taı jarysy, alaman báıge, qazaq kúresi, gir tasyn kóterý sekildi ulttyq sport túrlerinen saıystar uıymdastyryldy.
Kelýshiler úshin 100-den astam kıiz úı tigilip, as berildi.
Sonymen qatar, shara mazmuny tereń rýhanı-mádenı baǵdarlamalarmen jalǵasty.
«Oıtalqy» alańynda belgili tulǵalar eldik pen birlik, rýhanı sabaqtastyq jaıly paıymdy oılarymen bólisse, «Mańǵystaý mashaıyqtyń basqan jeri» atty kontserttik baǵdarlama men «Áýlıeler áýezi» dástúrli óner keshi kópshilikke rýhanı áser syılady. Barlyq mereıtoılyq is-sharalar demeýshilerdiń qarjysy esebinen uıymdastyryldy.
Budan buryn Memleket basshysy Nurǵısa Tilendıev eskertkishiniń ashylýyna oraı quttyqtaý joldady.