Prezıdent «Báıterek» ulttyq ınvestıtsııalyq holdınginiń basqarma tóraǵasyn qabyldady

ASTANA. KAZINFORM – Memleket basshysy Qasym-Jomart Toqaev «Báıterek» ulttyq ınvestıtsııalyq holdınginiń basqarma tóraǵasy Rýstam Qaraǵoıshınmen kezdesti. Bul týraly Aqordanyń baspasóz qyzmeti habaralady. 

Prezıdentke holdıngtiń bıyl atqarǵan qyzmetiniń qorytyndylary, sondaı-aq uıymdy transformatsııalaý jáne ekonomıkalyq damýdyń strategııalyq basymdyqtaryn iske asyrý aıasynda júrgizilgen jumystar baıandaldy. 

Rýstam Qaraǵoıshınniń aıtýynsha, bıyl holdıng el ekonomıkasyna jalpy somasy 9 trıllıon teńge qoldaý kórsetken. Qarajat bızneske járdem berýge, agroónerkásip keshenin damytýǵa, turǵyn úı qurylysy men ıpotekalyq nesıelerge baǵyttalǵan.

Qasym-Jomart Toqaevqa osy jyly respýblıka boıynsha 25 myńǵa jýyq joba qarjylandyrylǵany jóninde aqparat berildi. Sonymen qatar «Damý» qory bazasynda qurylǵan kepildik qorlarynyń qyzmet nátıjeleri tanystyryldy. Atalǵan qorlar shaǵyn jáne orta bıznes jobalaryn, sondaı-aq óńdeý ónerkásibi men ınfraqurylym salalaryndaǵy iri ınvestıtsııalyq bastamalarǵa kómek kórsetedi.

Budan bólek, Prezıdentke ınvestıtsııalyq holdıngtiń jumys modeli týraly málimet berildi. Bul «Investıtsııaǵa tapsyrys» qalyptastyrý, iri strategııalyq jobalardy súıemeldeý, sondaı-aq tikeleı sheteldik ınvestıtsııalardy tartý tetikterin damytýdy qarastyrady. Qazir jalpy quny 87 trıllıon teńgege jýyq, 1,5 myń ınvestıtsııalyq jobadan turatyn pýl jasaqtaldy.

Kezdesý sońynda Memleket basshysy ınvestıtsııalar tartý jáne ekonomıkanyń naqty sektoryn qarjylandyrý aıasyn keńeıtýdiń mańyzyn atap ótti. Prezıdent «Báıterek» holdıngine basym ınvestıtsııalyq jobalardy odan ári iske asyrýdy jáne ekonomıkaǵa uzaq merzimdi kapıtal tartýdy qamtamasyz etý boıynsha tapsyrma berdi.

Eske sala keteıik, buǵan deıin Prezıdent Qasym-Jomart Toqaev Bas prokýratýra, Memlekettik kúzet qyzmeti, Іshki ister mınıstrligi qyzmetkerlerine páter kiltin tabystaǵanyn habarlaǵan edik.