Prezıdent «Báıterek» holdınginiń damý josparymen tanysty
ASTANA. KAZINFORM — Memleket basshysy Qasym-Jomart Toqaev «Báıterek» holdınginiń basqarma tóraǵasy Rýstam Qaraǵoıshındi qabyldady. Bul týraly Aqorda málim etti.
Prezıdentke buǵan deıin bergen tapsyrmalarynyń oryndalý barysy jáne holdıngti damytýdyń negizgi baǵyttary baıandaldy.
Qasym-Jomart Toqaevqa ınvestıtsııalyq jáne kredıttik portfel 14,3 trıllıon teńgege jetip, 16,5 trıllıon teńgege deıin artady dep boljanyp otyrǵany, bul rette jyl saıynǵy taza paıda kólemi 400 mıllıard teńgeden asatyny jóninde málimet berildi.
— 2025 jyldyń qorytyndysy boıynsha holdıngtiń qoldaýymen 77,5 myń, sonyń ishinde kezekte turǵan 11,6 myń otbasy baspanamen qamtamasyz etildi. Ótken jyly 77 iri joba men shaǵyn jáne orta bızneske arnalǵan 27,4 myń joba qarjylandyrylyp, eksportqa taýar shyǵaratyn 131 kásipkerge qoldaý kórsetildi. Aýylsharýashylyq taýarlaryn óndiretin 7,2 myń agroqurylym kóktemgi egis jumystaryn júrgizý úshin 11,4 myń tehnıkany lızıngke aldy, — delingen habarlamada.
Basqarma tóraǵasy júrgizilip jatqan transformatsııa men «Báıterek» holdınginiń jańa uzaqmerzimdi damý strategııasy jaıynda aıtty. Joba aktıvterdi tıimdi basqarý, áleýetti bızneske qolaıly jaǵdaı jasaý jáne halyqtyń turmys sapasyn arttyrý sharalaryna arnalǵan proaktıvti ınvestıtsııalyq holdıng modeline kóshýdi qarastyrady.
Budan bólek, Prezıdentke birqatar ınvestıtsııalyq jobany iske asyrý barysy týraly baıandaldy. Jyl sońyna deıin Investıtsııalyq keńestiń qaraýyna ımportty almastyrýǵa, eksport pen ınfraqurylymdy damytýǵa baǵyttalǵan 26 jobany engizý josparlanyp otyr.
Kezdesý sońynda Memleket basshysy ekonomıkanyń ornyqty ósimin qamtamasyz etý, uzaqmerzimdi ınvestıtsııa tartý mańyzdy ekenin atap ótip, shaǵyn jáne orta bıznesti qoldaý tetigin kúsheıtý jóninde mindet júktedi. Sonymen qatar azamattar úshin baspananyń qoljetimdiligin arttyrýǵa aıryqsha nazar aýdardy.
Aıta keteıik, buǵan deıin Prezıdent Pashınıandy Armenııa Premer-mınıstri laýazymyna qaıta taǵaıyndalýymen quttyqtaǵanyn jazdyq.
