Prezıdent baılarǵa salyqty kóterýdi usyndy
ASTANA. KAZINFORM – Zańdy jolmen tapqan aktıvterge qandaı da bir shekteý qoıý kózdelip otyrǵan joq. Bul týraly Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn jarııalap jatqan Prezıdent Qasym-Jomart Toqaev aıtty.
- Salyq salýdaǵy ádildik máselesine jeke toqtalǵym keledi. Іri baılyq ıeleri úshin joǵary mólsherleme engizý máselesin talqylaıtyn ýaqyt keldi dep sanaımyn. Eshkimniń zańdy jolmen tapqan aktıvterine qandaı da bir shekteý qoıý kózdelip otyrmaǵanyn basa aıtamyn. Bul Konstıtýtsııanyń ózine qaıshy bolar edi. Sóz ár azamattyń elimizdiń damýyna shamasyna saı ári adal úles qosýy týraly bolyp otyr. Bul – ádildik máselesi, - dedi Qasym-Jomart Toqaev.
Prezıdenttiń aıtýynsha, Úkimet pen Quryltaı osy máseleni zerdelep, tıisti usynystar engizýge tıis.
- Salyq salýdaǵy ádildik ashyqtyqty talap etedi. Demek, salyq júıesin tolyq tsıfrlandyrý qajet. Salyq jınaý tıimdiligin arttyrý, kóleńkeli ekonomıkany qysqartý jáne sybaılas jemqorlyq táýekelderin azaıtý úshin jasandy ıntellektini qosa alǵanda, ozyq tehnologııalardy paıdalaný kerek, – dedi Memleket basshysy.
Buǵan deıin Memleket basshysy el ómirindegi tarıhı ózgeristerdiń barlyǵy halyqtyń kóz aldynda bolyp jatqanyn aıtqan edi.
