Prezıdent: Baıqońyr — Qazaqstan men Reseı áriptesteginiń jarqyn sımvoly
ASTANA. KAZINFORM — Baıqońyr ǵarysh aılaǵy Qazaqstan men Reseıdiń halyqaralyq ǵarysh naryǵyndaǵy ornyn nyǵaıtýǵa múmkindik beredi.
Bul pikirdi Memleket basshysy Qasym-Jomart Toqaev Reseı prezıdenti Vladımır Pýtınniń memlekettik sapary aıasynda aıtty.
Memleket basshysy ǵarysh salasyndaǵy yntymaqtastyq áli de perspektıvaly baǵyt retinde kórinetinin atap ótti.
— Baıqońyr ǵarysh aılaǵy kóptegen jyl boıy jemisti ǵylymı-tehnıkalyq áriptestiktiń jarqyn sımvoly bolyp keledi. «Báıterek» birlesken jobasyn júzege asyrý, sonyń ishinde jańa «Suńqar/Soıýz-5» zymyran tasyǵyshynyń jýyrdaǵy sátti ushyrylymy elderimizdiń halyqaralyq ǵarysh qyzmetteri naryǵyndaǵy ornyn nyǵaıtýǵa jańa múmkindikter ashady, — dedi Qasym-Jomart Toqaev Táýelsizdik saraıynda RF prezıdentimen kelissózderden keıingi BAQ ókilderine arnalǵan brıfıngte.
Aıta keteıik, 27-29 mamyr kúnderi Reseı Federatsııasy prezıdenti Vladımır Pýtınniń Qazaqstanǵa memlekettik sapary ótip jatyr. Memleketter basshylary bul saparda Qazaqstan men Reseı arasyndaǵy jan-jaqty strategııalyq seriktestiktiń jáne odaqtastyq qatynastardyń qazirgi jaı-kúıin, sondaı-aq ony nyǵaıtý perspektıvasyn talqylaıdy.
Búgin Memleket basshysy Qasym-Jomart Toqaev Reseı prezıdenti Vladımır Pýtındi Táýelsizdik saraıynda resmı qarsy aldy.
Buǵan deıin Qasym-Jomart Toqaev Reseı prezıdenti Vladımır Pýtınge Qazaqstan aýmaǵynda jolbarysty qaıta jersindirý isinde qoldaý kórsetkeni úshin rızashylyǵyn bildirdi.
