Prezıdent «Baıqońyr» ǵarysh aılaǵynyń qurylǵanyna 70 jyl tolýyna oraı vıdeoúndeý joldady
ASTANA. KAZINFORM – Memleket basshysy Qasym-Jomart Toqaev «Baıqońyr» ǵarysh aılaǵynyń qurylǵanyna 70 jyl tolýyna oraı vıdeo úndeý joldady. Aqordanyń baspasóz qyzmeti úndeý mátinin jarııalady.
Qurmetti dostar! Qadirli ǵarysh salasynyń qyzmetkerleri men ardagerleri!
Barshańyzdy «Baıqońyr» ǵarysh aılaǵynyń qurylǵanyna 70 jyl tolýymen quttyqtaımyn!
1957 jyly dál osy aradan jasandy Jer serigi ushyrylyp, ǵaryshty ıgerý dáýiri bastaldy. Kóp uzamaı, 1961 jyly aılaqtan tuńǵysh ǵaryshker ıÝrıı Gagarın kók júzine attandy. Bul tarıhı oqıǵa jahan jurtshylyǵyn biriktirip, adamzattyń ǵylym men órkenıet progresine degen senimin nyǵaıtty. Sodan beri Baıqońyrdan myńdaǵan Jer serigi ushyrylyp, ondaǵan mıssııa oryndaldy. Munda kórnekti ǵalymdar, konstrýktorlar men ınjenerler jumys istedi. Uly jetistikterdiń bastaýynda turǵan barlyq mamanǵa sheksiz rızashylyǵymdy bildiremin!
Biz álemdegi eń iri ǵarysh aılaǵynyń qazaq jerinde ornalasqanyn erekshe maqtan tutamyz. Halqymyzdyń qaharman uldary Toqtar Áýbákirov, Talǵat Musabaev jáne Aıdyn Aıymbetov osy aradan kosmosqa attandy.
Elimiz halyqaralyq ǵaryshty ıgerý isiniń belsendi múshesi sanalady. «Baıqońyr» aılaǵy – Qazaqstan men Reseıdiń dostyqqa, tatý kórshilikke jáne ózara túsinistikke negizdelgen uzaqmerzimdi strategııalyq seriktestiginiń jarqyn kórinisi.
Sońǵy onjyldyqtarda Qazaqstan ulttyq ekonomıkanyń damýyna yqpal etetin birqatar aýqymdy ǵarysh jobalaryn iske asyrdy. Elimiz Baıqońyrdy halyqaralyq yntymaqtastyqtyń, ǵylym men bilimniń jáne týrızmniń ortalyǵyna aınaldyrýǵa umtylady. Ǵarysh qyzmetiniń jańa naryqtaryna shyǵý, jas ınjenerlerdiń, konstrýktorlar men ǵalymdardyń áleýetin arttyrý jarqyn bolashaqqa jol ashady.
Osy oraıly sátti paıdalanyp, Baıqońyr qalasynyń turǵyndaryna aıryqsha alǵys aıtqym keledi. Sizder tabandy eńbek etip, ǵaryshty zertteý isiniń izasharlarynan qalǵan mol murany muqııat saqtap kelesizder. Bul – zor qurmetke laıyq. Ǵarysh salasy búkil adamzatty árdaıym ortaq maqsatqa jumyldyryp, jańashyldyq pen ǵylymı-tehnıkalyq progreske bastaıdy. Baıqońyr aldaǵy ýaqytta da uly jańalyqtar men ozyq ınnovatsııalardyń qaınar kózi bola beredi dep senemin!
Barshańyzǵa amandyq jáne tabys tileımin!
Aıta ketsek, ǵarysh aılaǵy men attas qalany qamtıtyn ǵarysh kesheni 1955 jyly 2 maýsymda quryldy.