Prezıdent bavarııalyq bıznesmenderdi ónerkásip jáne logıstıka habtaryn birlese qalyptastyrýǵa shaqyrdy
ASTANA. KAZINFORM – Qasym-Jomart Toqaev Qazaqstan-Bavarııa tehnologııalyq forýmynyń ashylýynda mıkroelektronıka óndirisindegi yntymaqtastyq perspektıvasyna aıryqsha toqtaldy. Bul týraly Aqorda habarlady.
– Bavarııa Infineon Technologies, Siltronic, Rohde & Schwarz sekildi dúnıe júzi moıyndaǵan kompanııalardy biriktirip, jartylaı ótkizgishter men mıkroelektronıka salasynda Eýropadaǵy eń úzdik ekojúıelerdiń birin qalyptastyrdy. Qazaqstanǵa aýqymdy mıkroshema óndirisinen góri otandyq ónerkásiptiń damýyna tikeleı septigin tıgizetin qosylǵan quny joǵary ónimder shyǵarýdan bastaǵan ońtaıly bolar edi. Energetıka, taý-ken, metallýrgııa, kólik jáne óńdeý ónerkásibi salalaryna úlken qýat aǵyndaryn retteıtin elektronıkalar, datchıkter, ólshem júıeleri men avtomattandyrylǵan kúrdeli basqarý júıesi kóbirek qajet. Osy oraıda, Bavarian Chips Alliance qatysýymen arnaıy seriktestik baǵdarlamasyn iske qosýdy usynamyn. Osynyń aıasynda tıisti qazaqstandyq kompanııalardy, ǵylymı-zertteý mekemelerin jáne damý ınstıtýttaryn bavarııalyq jartylaı ótkizgishter óndirisiniń ekojúıesimen sabaqtastyrýǵa bolady, – dedi Prezıdent.
Memleket basshysynyń pikirinshe, jańa óndiristerdiń halyqaralyq naryqqa shyǵýy úshin kólik jáne logıstıka salasyndaǵy senimdi baılanystar óte mańyzdy.
Bul rette Qasym-Jomart Toqaev bavarııalyq bıznesmenderdi Transkaspıı halyqaralyq kólik baǵdarynyń boıynda ónerkásip jáne logıstıka habtaryn birlese qalyptastyrýǵa shaqyrdy.
