Prezıdent bastamalaryna arnalǵan rezervti bólý qaǵıdalary jańartyldy

ASTANA. KAZINFORM – Prezıdent bastamalaryna arnalǵan rezervti bólý qaǵıdalary Bıýdjet kodeksiniń 18-babynyń 3-tarmaǵyna sáıkes ázirlendi jáne Prezıdent bastamalaryna arnalǵan rezervti bólý tártibin aıqyndaıdy. 

— Prezıdent bastamalaryna arnalǵan rezerv Memleket basshysynyń Qazaqstan halqyna jyl saıynǵy joldaýlaryn jáne Prezıdenttiń basqa da bastamalaryn iske asyrýǵa baılanysty qarjy jylynda kútpegen jáne keıinge qaldyrmaı qarjylandyrýdy talap etetin shyǵyndardy qarjylandyrýǵa arnalǵan transfertter túsimderin esepke almaǵanda, kezekti qarjy jylyna arnalǵan respýblıkalyq bıýdjet kiristeriniń josparlanatyn kóleminiń keminde 1,5 jáne 3 paıyzynan aspaıtyn mólsherde josparly kezeńniń birinshi jylyna arnalǵan respýblıkalyq bıýdjet quramynda qalyptastyrylady, — delingen qujatta. 

Prezıdentiniń bastamalaryna arnalǵan rezerv bıýdjetin josparlaý ortalyq ýákiletti organ ákimshilendiretin bıýdjettik baǵdarlama boıynsha kózdeledi jáne qarjy jyl ishinde bólinedi.

Sonymen qatar Prezıdent bastamalaryna arnalǵan rezervten bólingen qarajatty paıdalaný Bıýdjet kodeksiniń talaptaryna, bıýdjetti atqarý jónindegi ortalyq ýákiletti organ aıqyndaıtyn bıýdjettiń qazynashylyq atqarylýy jáne olarǵa kassalyq qyzmet kórsetý rásimderine sáıkes júzege asyrylady.

Odan bólek Prezıdent bastamalaryna arnalǵan rezervten bólingen aqsha qarjy jyly ishinde paıdalanylmaǵan jaǵdaıda tıisti bıýdjettik baǵdarlamanyń ákimshisi Prezıdent bastamalaryna arnalǵan rezervti qalpyna keltirý arqyly bólingen aqshany jyldyń 20 jeltoqsanyna deıin qaıtarýdy qamtamasyz etedi.

Taǵy bir jaıt bıýdjetti atqarý jónindegi ortalyq ýákiletti organ Prezıdent Ákimshiligine Prezıdent bastamalaryna arnalǵan rezervten aqshanyń paıdalanylýy jáne onyń qaldyqtary týraly aqparatty aı saıyn usynady.

Úkimet qaýlysy 2025 jylǵy 20 shilde kúni kúshine enedi.