Prezıdent bastamalaryn júzege asyrýǵa quryltaı músheleri zor úles qosyp keledi — Qarın
ASTANA. KAZINFORM — Astanada Ulttyq quryltaıdyń «Azamattyq qoǵam», «Mádenıet. Óner. Rýhanııat», «Bilim jáne ǵylym» atty jumys sektsııalarynyń otyrystary ótti, dep habarlaıdy Aqordanyń baspasóz qyzmeti.
Sektsııalarǵa Prezıdenttiń ishki saıasat máseleleri jáne kommýnıkatsııalar jónindegi kómekshisi Rýslan Jeldibaı, Mádenıet jáne aqparat mınıstri Aıda Balaeva men Ǵylym jáne joǵary bilim mınıstri Saıasat Nurbek moderator boldy. Sondaı-aq sektsııalardyń jumysyna Oqý-aǵartý mınıstri Ǵanı Beısembaev qatysty.
Jıynda Ulttyq quryltaı tóraǵasynyń orynbasary — Memlekettik keńesshi Erlan Qarın Ulttyq quryltaıdyń bıylǵy qyzmetiniń negizgi baǵyttary Prezıdenttiń qańtar aıynda «Ana tili» gazetine bergen suhbatynda jáne Úkimettiń keńeıtilgen otyrysynda sóılegen sózinde aıqyndalǵanyn aıtty.
Memlekettik keńesshi júrgizilip jatqan reformalardyń mańyzdylyǵyn atap ótti.
— Búginde Memleket basshysynyń bastamasymen jáne basshylyǵymen memlekettigimizdi damytýdy jáne ulttyq ekonomıkanyń negizderin nyǵaıtýdy kózdeıtin asa mańyzdy reformalar júıeli túrde júzege asyrylyp jatyr. Biz qazirdiń ózinde bul reformalardyń naqty nátıjesin kórip otyrmyz. Elimizde ınjenerlik jeliler men kommýnaldyq sharýashylyq nysandary barynsha jańartylyp jatyr. Energetıka salasynda iri jobalar iske asyrylýda. Barlyq aımaqta myńdaǵan shaqyrym kólik jáne temir joldaryn jóndeý jáne salý jumystary qolǵa alyndy. Birqatar qalada áýejaıdyń eski termınaly jańartylyp, jańa termınal iske qosyldy. Negizinen memleket qoldaýynyń arqasynda aýyl sharýashylyǵy qyzmetkerleri rekordtyq kólemde astyq jınady. Turǵyn úı qurylysy, onyń ishinde áleýmettik turǵyn úı qurylysy qarqyndy damyp keledi. Memleket tarapynan ǵylym men bilimdi qoldaý úshin buryn-sońdy bolmaǵan sharalar qolǵa alyndy. Qoǵamda pedagogterdiń, dárigerlerdiń, ǵalymdardyń mártebesi, jumysshy mamandyqtardyń abyroı-bedeli artyp keledi. Jastardy turaqty túrde qoldaýǵa, buqaralyq sportty jáne kreatıvti ındýstrııany damytýǵa aıryqsha nazar aýdarylyp otyr. Munyń bári — bastalǵan ózgerister men qol jetkizgen jetistikterdiń az ǵana bóligi. Prezıdent usynǵan bastamalardyń kóbisin júzege asyrýǵa Ulttyq quryltaı músheleri zor úles qosyp keledi. Bul — memleket pen qoǵamnyń ózara tıimdi yqpaldastyǵynyń bir kórinisi, — dedi Erlan Qarın.
Jumys sektsııalarynyń otyrystarynda Ulttyq quryltaı músheleriniń bastamalary men usynystarynyń oryndalý barysy qaraldy. Sonymen qatar azamattyq qoǵamdy damytý jáne berekeli birlikti nyǵaıtý, adam quqyqtaryn qorǵaý, mádenı-rýhanı damý, áleýmettik máselelerdi sheshý salasyna qatysty oılaryn ortaǵa saldy.
Jıyn sońynda moderatorlar talqylaý kezinde kóterilgen bastamalardy Quryltaı hatshylyǵy tórtinshi otyrysqa daıyndyq barysynda pysyqtap, júıeleıtinin atap ótti.
Buǵan deıin habarlanǵandaı, Ulttyq quryltaıdyń aıasynda 2024 jyly atqarylǵan jumystyń qorytyndysy jasaldy.