Prezıdent: Basshylardyń ustalǵany – memlekettik kompanııalarda jemqorlyq beleń alǵanyn kórsetetin jaǵdaı

ASTANA. KAZINFORM – Memleket basshysy Qasym-Jomart Toqaev Qaýipsizdik Keńesiniń shuǵyl otyrysynda «Samuryq Qazyna» ulttyq ál-aýqat qory men «Qazaqstan temir joly» UK» AQ basshylarynyń ustalýyna baılanysty málimdeme jasady. Bul týraly Aqorda habarlady.

Prezıdent
Foto: Aqorda

– Keshe elimizdiń buqaralyq aqparat quraldary «Samuryq-Qazyna» qory men «Qazaqstan temir joly» kompanııasy basshylarynyń ustalǵany týraly málimet taratty. Ashyǵyn aıtqanda, bul – memlekettik kompanııalarda jemqorlyq beleń alǵanyn kórsetetin asa kúrdeli jaǵdaı. Jalpy, zań boıynsha tergeý máselelerin jarııalaýǵa nemese ashyp kórsetýge bolmaıdy. Onyń ústine tergeý jumysy da endi bastaldy, - dedi Memleket basshysy.

Prezıdent qazirdiń ózinde myna nárseni anyq aıtýǵa bolatynyn atap ótti. Bul – «Zań men Tártip» tujyrymdamasyn jarııalap, ony Konstıtýtsııada memlekettik basqarý men qoǵam ómiriniń basty qaǵıdaty retinde bekitkeli beri birtutas júıege kiretin memlekettik kompanııalarda bolyp turǵan sybaılas jemqorlyqqa qatysty alǵashqy iri is.

– Elimizdiń Konstıtýtsııasy 15 naýryzda jalpyulttyq referendým kezinde biraýyzdan qabyldandy, 1 shilde kúni zańdy kúshine endi. Osylaısha, memleketimizdiń bas qujaty ádiletti túrde «Halyq Konstıtýtsııasy» dep ataldy. Konstıtýtsııanyń erejeleri men baptaryn buzýǵa, halqymyzdyń osy qasıetti qujatyn kelemej jasaýǵa, kemsitýshilik kórsetýge eshkimniń de haqy joq, - dedi Qasym-Jomart Toqaev.