Prezıdent: Básekege qabiletsiz kompanııalardy memleket esebinen súıreýdi doǵarý qajet
ASTANA. QazAqparat - Qazaqstan Prezıdenti Nursultan Nazarbaev Úkimetke jeke jáne zańdy tulǵalarǵa bankrottyqtyń naqty ári túsinikti protsedýralaryn jasaqtaýdy tapsyrdy.
Bul týraly Memleket Basshysy búgin «Qazaqstan jańa jahandyq naqty ahýalda: ósim, reformalar, damý» atty Qazaqstan halqyna Joldaýynda málim etti.
«Úkimetke jeke jáne zańdy tulǵalarǵa bankrottyqtyń naqty ári túsinikti protsedýralaryn jasaqtaýdy tapsyramyn. Onyń qorqynyshty eshteńesi joq. Ol meılinshe jeńil jáne ashyq bolýy kerek», - dep atap ótti Prezıdent.
Qazaqstan Prezıdentiniń atap kórsetkenindeı, tıimdi retteýmen birge bankrottyqtyń da protsesi men tıimsiz kompanııalardy saýyqtyrý qatar júrýi tıis.
«Aýyl sharýashylyǵy sýbektileri óz jerlerine ıe, ózderi tapqan aqshany ózderine qaldyrady, memleketke tek salyq tólenedi. Mashına jasaý zaýyttarynyń barlyq múlki kásipkerlerdiki. Onda úkimet nege olarǵa halyqtyń qarajatynan aqsha berýi qajet?! Óıtkeni, biz qaýqarsyz kompanııalardy demep otyrmyz. Eger biz básekelestik týraly aıtatyn bolsaq, onda tıimdi retteýmen birge bankrottyqtyń da protsesi men tıimsiz kompanııalardy saýyqtyrý qatar júrýi tıis. Naryqtyq ekonomıka - myqtylardyń básekelestigi. Jeńilgenderde naryqtan ketýge nemese qaıtadan bastaýǵa múmkindikteri bolǵany lázim. Bizde ol joq. Tıimsiz kompanııalar túrli sýbsıdııalar men jeńildikterge kezekke turady jáne memleketke qol sozyp otyrady. Eshbir damyǵan elde kompanııanyń bankrotqa ushyraýy salanyń quldyraýyna nemese kásiporynnyń jabylyp, jumyskerlerdiń jumystan shyǵarylýyna ákep soqtyrmaıdy», - dedi Elbasy.
N.Nazarbaevtyń aıtýynsha, jyl saıyn mıllıondaǵan fermerler bankrot bolyp jatady. Degenmen, onyń ornyna básekege qabiletti jańa fermerler keledi.
«Damyǵan elderde bankrottyqtan eshteńe toqtap qalmaıdy. Bizde bankrottyq týraly aıta qalsań, kásiporyn jabylyp, esigine qulyp ilinip, adamdar jumyssyz qalady. Basqa elde ondaı joq. Saýyqtyrý men sot protsesi óz kezegimen júredi, bankrottyq jaǵdaıǵa ákep tiregen basshy jaýapty óz moınyna alady. Ornyna basqa kásipker keledi, kásiporyn jumysyn jalǵastyra beredi. Bizde ondaı joq. Sondyqtan barlyǵy sııaqty jumys isteıik. Bankrottyq - salanyń quldyraýy emes, bul jańa menedjer men jańa ınvestıtsııalardyń kelýi. Tıimsiz basshynyń ornyna, jańa ıeger keledi. Biz básekege qabiletsiz kompanııalardy memleket qarjysyna súıremeýimiz kerek. Biz sondaı ekonomıkada ómir súrip jatyrmyz. Biz jahandyq ekonomıkada, básekelestik jadaıynda, jumys istep jatyrmyz. Biz ony súıreımiz, demeımiz, biraq sońynda báribir ol qulaıtyny belgili ǵoı», - dedi Memleket basshysy.
