«Prezıdent barlyq nesıelerdiń 90% keshirý týraly Jarlyqqa qol qoıdy» - feık

NUR-SULTAN. QazAqparat - Qaznette taqyrybynda Qazaqstan prezıdenti Qasym-Jomart Toqaev halyqqa berilgen barlyq tutynýshylyq nesıelerdiń 90%-yn keshirý týraly Jarlyqqa qol qoıǵany aıtylǵan vıdeo taralýda. Stopfake.kz saıtynyń jazýynsha, bul málimet – jalǵan, dep habarlaıdy QazAqparat.

Shyn máninde, el Prezıdenti mundaı Jarlyqqa qol qoıǵan joq. Sonymen qatar, vıdeoda Memleket basshysynyń Jarlyǵy týraly emes, qarjy vıtse-mınıstri Marat Sultanǵazıev túsindirgen jeke tulǵalardyń bankrottyǵy týraly zań jobasy jaıly aıtylady.
Jobada kredıttik qaryzdardyń 90%-yn keshirý kózdelmegen. Ol halyqtyń tólem qabilettiligin qalpyna keltirýge jáne adal nesıe alýshylarǵa kómektesýge baǵyttalǵan. Atap aıtqanda, zań jobasynda turaqty tabys bolǵan jaǵdaıda, sotta qaryzdy bes jyl boıy bólip tóleý múmkindigin alý qarastyrylǵan. Eger boryshkerdiń turaqty tabys kózi bolmasa, onda jobada eki nusqa qarastyrylmaǵan: sotsyz jáne sot arqyly bankrottyq jarııalaý. Bul protsedýralar týraly tolyǵyraq myna jerden oqı alasyz.
Demek, vıdeo taqyryby – klıkbeıt. Mundaı taqyryptar paıdalanýshylardyń nazaryn aýdarý, sol arqyly jańalyqtar men vıdeolardy kóp kórsetýge baǵyttalǵan. Mundaı taqyryptardaǵy aqparat kóp jaǵdaıda ádeıi burmalanady, al faktiler asyra aıtylady.