Prezıdent barlyq deńgeıdegi máslıhattardy merziminen buryn taratady
ASTANA. KAZINFORM — Memleket basshysy Qasym-Jomart Toqaev barlyq deńgeıdegi máslıhattardyń ókilettigin merziminen buryn toqtatý jóninde keńes ótkizbek. Prezıdenttiń aıtýynsha, tıisti sheshimnen keıin Ortalyq saılaý komıssııasy jańa máslıhattar saılaýynyń kúnin jarııalaýy kerek. Bul qadam jergilikti ókildi organdardyń bilikti ári kásibı quramyn qalyptastyrýǵa múmkindik beredi.
Prezıdent sóz basynda elimizdiń memlekettik basqarý júıesi zaman talabyna saı jańǵyrtylyp jatqanyn aıtqan edi. Endi osy jumysty toqtatpaı, tek alǵa qaraı júrý kerek.
— Qazirgi kezeńde biz jergilikti ókildi organdardyń, ıaǵnı máslıhattardyń saılaýyn ótkizýimiz qajet. Máslıhat depýtattarynyń ókilettigi Konstıtýtsııada jáne tıisti zańdarda aıqyndalǵan merzimge deıin saqtalady. Degenmen olardyń kópshiligi «Amanat» partııasynyń atynan saılandy. Búginde bul saıası uıym «Ádilet» partııasyna qosylyp, óz qyzmetin toqtatty. Jaqynda tıisti zańnamalyq rásimder aıaqtalady. Sol kezde máslıhat depýtattarynyń basym bóliginiń qyzmetiniń zańdylyǵyna qatysty másele týyndaıdy, — dedi Memleket basshysy.
Jalpy, jergilikti depýtattar aımaqtaǵy jurtshylyqtyń múddesin qorǵaıdy, bıýdjetti bekitedi jáne basqa da mindetterdi oryndaıdy.
Bir sózben aıtqanda, eldi-mekenderdi órkendetý isine belsene atsalysady. Demek, ókildi organdar qyzmetiniń zańǵa sáıkes bolýy aıryqsha mańyzdy.
— Sondyqtan men jaqyn arada Premer-mınıstrmen jáne Quryltaı Tóraǵasymen barlyq deńgeıdegi máslıhattardyń ókilettigin merziminen buryn toqtatý jóninde keńesemin. Sodan soń tıisti Jarlyqqa qol qoıamyn. Kóp uzamaı Ortalyq saılaý komıssııasy saılaý ótetin kúndi jarııalaýy kerek, — dep tapsyrma berdi Prezıdent.
Bul qadam máslıhattardyń bilikti ári kásibı korpýsyn qalyptastyrýǵa jol ashyp, onyń jumysyna tyń serpin beredi.
— Osy saılaýdyń joǵary deńgeıde jáne sapaly ótýine sizder de mol úles qosasyzdar dep senemin, — dedi Q. Toqaev Halyq Keńesiniń múshelerine.
