Prezıdent «Barys» klýbyndaǵy jaǵdaıǵa baılanysty jaýapty organdarǵa tapsyrma berdi

ASTANA. KAZINFORM – Memleket basshysy «Barys» hokkeı klýbynyń balalar men jasóspirimder komandasy oıynshylary ata-analarynyń shaǵymyna nazar aýdardy. Bul týraly Kazinform agenttigi Qazaqstan Respýblıkasy Prezıdentiniń keńesshisi-baspasóz hatshysy Rýslan Jeldibaıǵa silteme jasap habarlaıdy. 

Ata-analar hatta qarjylyq jáne uıymdastyrýshylyq máselelerge baılanysty Qazaqstandaǵy balalar hokkeıiniń keleshegine alańdaýshylyqtaryn jetkizgen.

Olardyń jazýynsha, atalǵan máselege klýbtyń qazirgi basshylyǵy kóz juma qaraǵan. Sondyqtan Prezıdenttiń osy iske aralasýyn suraǵan. Qasym-Jomart Toqaev atalǵan máselege oraı jaýapty organdarǵa tapsyrma berdi. Nátıjesinde «Barys» hokkeı klýbynyń tárbıelenýshilerin Reseıdiń osy maýsymdaǵy chempıonatyna qatystyrý jumystary qolǵa alyndy.

Shaǵymda kóterilgen máselelerdiń bári, sonyń ishinde klýbtyń otandyq jáne sheteldik oıynshylar, jattyqtyrýshylar, basqa da uıymdar aldyndaǵy qarjylyq mindettemeleri bıýdjet shyǵyndaryn ońtaılandyrý arqyly sheshimin tapty.

Klýbtaǵy qarjylyq jaǵdaıdyń nasharlaýyna kináli laýazymdy tulǵalarǵa qatysty tıisti shara qabyldandy.