Prezıdent: Bankter tutyný nesıesimen áýestenip ketti

ASTANA. QazAqparat – Memleket basshysy qarjy naryǵyndaǵy qazirgi jaǵdaı týraly aıtty, dep habarlaıdy QazAqparat tilshisi.

«Mundaı ahýal Úkimetti tikeleı qarjylandyrýmen, kepildik jáne sýbsıdııa berýmen aınalysýǵa májbúrleıdi. Bul tásil tıimsiz, kóp qarajatty talap etedi ári naryqtyq ekonomıka qaǵıdalaryna qaıshy keledi. Sonymen birge, naqty sektorǵa beriletin kredıt azaıyp jatqanda bankter tutyný nesıesimen áýestenip ketti. Osy jaǵdaı qarjy júıesine tónetin syn-qaterlerdiń kóbeıýine jáne azamattardyń shekten tys qaryzǵa batýyna ákep soqtyrdy», - dedi Qasym-Jomart Toqaev Qazaqstan halqyna Joldaýynda.

Memleket basshysy málimdegendeı, 2019 jyly 500 myń azamattyń kepilsiz nesıesin keshirý týraly sheshim jáne jaqynda qabyldanǵan jeke tulǵalardyń bankrottyǵy týraly zań máseleni birshama rettedi.

Prezıdenttiń aıtýynsha, ahýaldy birjola túzeý úshin jańadan júıeli sharalar qabyldaý qajet.

«Azamattardyń qarjy saýatyn arttyrý óte mańyzdy. Bul rette «Amanat» partııasynyń «Qaryzsyz qoǵam» jobasyn erekshe atap ótý qajet. Sonyń arqasynda elimizdiń 8 aımaǵynda 20 myńnan astam adam qarjylyq saýatyn arttyrdy. Olardyń kópshiligi – 10 jáne odan da kóp nesıe alǵan adamdar. Bul joba az ýaqytta óziniń tıimdiligin kórsetti. Úkimetke «Amanat» partııasymen birlesip, onyń aýqymyn keńeıtýdi tapsyramyn. «Qaryzsyz qoǵam» jobasynyń ıgiligin búkil elimiz kórýi qajet», - deıdi ol.