Prezıdent: Bankter týraly zań qabyldaý mańyzdy qadam bolmaq

ASTANA. KAZINFORM — Bankter naqty sektorǵa belsendi túrde qarjy salýy kerek. Bul týraly Prezıdent Qasym-Jomart Toqaev Qazaqstan halqyna Joldaýy barysynda aıtty.

— Ekinshi dárejeli bankter naqty sektorǵa belsendi túrde qarjy salýy kerek. Bul másele qoǵamda baıaǵydan qyzý talqylanyp jatyr. Osy jumysty kóp sozbaı qolǵa alý qajet. Qazaqstandaǵy bankterdiń aktıvteri men qarajaty damyǵan elderge qaraǵanda orta eseppen birneshe ese kóp paıda ákeledi. Sebebi, bizdiń bankter ekonomıkaǵa nesıe bergennen góri qarjylyq táýekeli tómen baǵyttarǵa aqsha salǵandy jón kóredi. Osy máseleni depýtattar, sarapshylar únemi kóterip júr, — dedi Qasym-Jomart Toqaev.

Prezıdenttiń aıtýynsha, Ulttyq bank pen Úkimet bankterdiń aqshasyn ekonomıkaǵa barynsha tartýdyń tıimdi tásilderin tabýy qajet. Endi bul máseleni sozýǵa bolmaıdy, shuǵyl sheshý qajet.

— Bankter týraly zań qabyldaý osy baǵyttaǵy mańyzdy qadam bolmaq. Bul zańda ekonomıkanyń suranysy men tehnologııalyq ózgerister eskerilýi qajet. Qujatta básekeni kúsheıtý, naryqqa jańa qatysýshylardy tartý, qarjy júıesindegi tehnologııalardy ilgeriletý jáne tsıfrlyq aktıvter aınalymyn yryqtandyrý máseleleri qamtylýy kerek. Úkimet Qarjy naryǵyn retteý agenttigimen birlesip, zań jobasyn jan-jaqty pysyqtaýy qajet. Depýtattardan osy zańdy jyl sońyna deıin qabyldaýdy suraımyn, — dedi Memleket basshysy.

Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.

Kazinform saıty tikeleı efırmen qatar, jazbasha translıatsııa da jasaıdy.

Sondaı-aq Joldaý mátinin agenttiktiń telegram arnasynan oqýǵa bolady.