Prezıdent balany ajaldan alyp qalǵan qaraǵandylyq dárigerler týraly aıtty
ASTANA. KAZINFORM – Memleket basshysy Qasym-Jomart Toqaev saltanatty is-sharada bala ómirin saqtap qalǵan qaraǵandylyq dárigerlerdiń qajyrly eńbegin úlgi etti.
Prezıdenttiń aıtýynsha, elimiz sapaly ári qarqyndy túrde ósip-órkendeýi úshin azamattarymyzdyń táni de, jany da saý bolýǵa tıis. Dárigerler osy izgi maqsat jolynda aıanbaı qyzmet etip júr.
– Qazaqta «Jaqsynyń jaqsylyǵyn aıt, nury tasysyn» degen sóz bar. Meniń atyma kúnine júzdegen hat kelip túsedi. Azamattarymyz ózderiniń aryz-shaǵymyn, usynys-tilegin, sondaı-aq jyly lebizin bildirip jatady. Búgin Qaraǵandy oblysynyń turǵyny jýyrda ǵana joldaǵan bir hatqa toqtalyp ótkim keledi. Onda oqys jaǵdaıǵa tap bolǵan 4 jasar balany oblystyq aýrýhana dárigerleriniń aman alyp qalǵany jóninde jazylǵan. Búldirshinniń jaqyn týystary medıtsına mamandarynyń óz isine adaldyǵyn erekshe atap ótken. Aýrýhana qyzmetkerlerine, sondaı-aq densaýlyq saqtaý salasynyń basshylaryna rızashylyǵyn bildirgen, – dedi Qasym-Jomart Toqaev.
Kishkentaı balanyń ómirin saqtap qalǵan bilikti maman Arǵyn Bıdaıbaev búgin Aqordaǵa keldi jáne Qurmet ordenimen marapattaldy. Ol qazir Qaraǵandy oblysy Temirtaý qalasynyń kópbeıindi aýrýhanasynyń dırektory bolyp eńbek etip júr.
Bala kópqabatty úıdiń joǵarǵy qabatynan qulap ketken edi. Onda jabyq bas-mı jaraqaty tirkelgen. Keıin ish qýysyna baılanysty asqynýlar týyndap, hırýrgterdiń aralasýyna týra kelgen. Qoly men súıekterinde birneshe synyq boldy.
– Mundaı jaraqatta travmatolog, hırýrg, neırohırýrg, sondaı-aq mindetti túrde reanımatolog pen anestezıologtan quralǵan mýltıdıstsıplınarlyq top jedel túrde jasaqtaldy. Ota óte kúrdeli ári uzaqqa sozyldy. Barlyq qajetti sharalar joǵary deńgeıde atqarylyp, balaǵa muqııat kútim jasaldy. Qazir búldirshin ózdiginen júrip-turady, sóıleıdi jáne ońaltý kezeńinen ótip jatyr. Búgin Aqordada Memleket basshysynyń qolynan marapat alý – men úshin zor qurmet. Kóńilimdi qýanysh pen tolqý qatar bılep tur. Bul – meniń eńbegime ǵana emes, búkil Qaraǵandy oblysynyń, kún saıyn naýqastardyń ómiri men densaýlyǵy úshin eńbek etip júrgen medıtsına qyzmetkerleriniń eńbegine kórsetilgen qurmet, – dedi Arǵyn Bıdaıbaev.
Aıta keteıik, Aqordada Prezıdent medıtsına qyzmetkerlerin kásibı merekesimen quttyqtady. Elimizde maýsymnyń ər úshinshi jeksenbisi – medıtsına qyzmetkerleriniń kúni. Bul kúndi atap ótý QR Prezıdentiniń 1998 jylǵy Jarlyǵymen belgilengen.
Prezıdent bir top medıtsına qyzmetkerine memlekettik nagradalar tapsyrdy.
