Prezıdent balalardyń hattaryna jaýap berdi

Dástúr boıynsha Jańa jyl qarsańynda elimizdiń barlyq aımaǵynda «Tilekter shyrshasy» ornatylady. Sol jerge balalar óz tilekterin jazyp qaldyrady, dep habarlaıdy Kazinform Aqordaǵa silteme jasap. 

Bıyl atalǵan joba aıasynda Memleket basshysynyń atyna Qazaqstannyń túkpir-túkpirinen kóptegen hat kelip tústi, sonyń ishinde kópbalaly otbasynan shyqqan, ata-ana qamqorlyǵynsyz qalǵan, múmkindigi shekteýli jáne jetim balalardan 100-den astam tilek joldandy.

Búldirshinder óz hatynda velosıped, dombyra, kompıýter, jazǵy lagerge joldama jáne basqa da zattardy syılyqqa alýdy, tipti Astanaǵa kelip, «Aqorda» rezıdentsııasyn aralap kórýdi suraǵan.

Balalardyń hattaryna jaýap bergen Prezıdent olardy Jańa jylmen quttyqtady.

Sondaı-aq bul ertegideı erekshe mereke ekenin atap ótip, búldirshinderge óz atynan arnaıy syılyqtar jiberdi.

Memleket basshysy balalardy bilimge qushtar bolýǵa, kitap oqýǵa, sportpen shuǵyldanýǵa, tabıǵatty aıalaýǵa jáne jaqsylyq jasaýǵa shaqyrdy.