Prezıdent balalar bilimin baǵalaýdaǵy alshaqtyq jaıly: Ózińdi óziń aldaý jarǵa jyǵady

ASTANA. QazAqparat – Mektepte alynǵan bilimdi qalaı shynaıy baǵalaý qajettigin oılastyrý qajet. Bul týraly elimizdiń áleýmettik-ekonomıkalyq damýy jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Qazirgi zamanda damýdyń basty kilti – bilim. Biz zaman talabyna barynsha beıim, sondaı-aq jarqyn bolashaqty óz qolymen qalaıtyn jasampaz urpaq tárbıeleýimiz kerek. PISA halyqaralyq zertteýine qarasaq, elimiz sońǵy 10 jylda orta bilim sapasy boıynsha 80 eldiń ishinde elýinshi-alpysynshy orynnan kóterilgen joq. Demek, jaǵdaıymyz máz emes. Basty túıtkildiń biri – balalardyń bilimin birjaqty baǵalaý. Elimizde bilimniń sapasyna emes, kórsetkishtiń joǵary bolýyna basa mán beriledi. Oqýshylardyń biryńǵaı ulttyq testileýden alǵan baǵasy men mekteptegi baǵasy eki túrli. Aıyrmashylyq 30 paıyz nemese odan da kóp bolýy múmkin. Sondaı-aq osyndaı alshaqtyq halyqaralyq jáne ulttyq baǵalaý kezinde baıqalady. Ashyǵyn aıtsaq, munyń bári jappaı beleń alǵan kózboıaýshylyqtyń kesirinen bolyp otyr. Ózińdi óziń aldaý jarǵa jyǵady», - dedi Qasym-Jomart Toqaev.

Osy oraıda Memleket basshysy mektepte alǵan bilimdi qalaı shynaıy baǵalaýǵa bolatyndyǵyn oılastyrý qajettigin basa aıtty.

«Sonymen qatar jańa vedomstvo nemese testileý, sertıfıkattaý jáne basqa da ortalyqtar qurýdyń máni joq. Biz munan ótip kettik. Bul da jemqorlyq táýekelder kózi. Sondyqtan Úkimet osyǵan qatysty óz usynymyn berýi tıis», - dedi Prezıdent.