Prezıdent baǵanyń kúrt ósimin tejeýge qatysty tapsyrma berdi

ASTANA. QazAqparat – Kókónis qoımalarynyń ınfraqurylymyn qurý baǵytynda bızneske kómektesý qajet. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

Prezıdent kókónis qoımalarynyń, kóterme-taratý ortalyqtarynyń jáne aýyldyq servıstik ótkizý kooperatıvterdiń ınfraqurylymyn qurý baǵytynda bızneske kómektesý qajet ekenin aıtty.

«Bul – memleket pen jekemenshiktiń seriktestigi úshin zor múmkindik. Jaqynda Premer-Mınıstrdiń orynbasary Serik Jumanǵarınge bul másele boıynsha tıisti tapsyrmamdy berdim. Agroónerkásip keshenine qatysty máseleniń bári basqa salalarǵa da qatysty ekenin umytpaǵan jón. Taǵy da qaıtalap aıtamyn. Joǵary ónim alýdy qamtamasyz etý kerek. Ashyq básekelestik bolýǵa tıis. Bir sózben aıtqanda, osy saladaǵy basty túıtkilderdi dereý sheshý kerek. Sonda ǵana baǵanyń kúrt ósimin tejeýge múmkindik týady», - dedi Memleket basshysy.

Qasym-Jomart Toqaev aýyl sharýashylyǵy ónimderin saqtaý men ótkizýdiń zamanaýı ınfraqurylymyn qurý jumystaryn jedeldetý qajet ekenin aıtty. Kóp jaǵdaıda onyń joqtyǵy deldaldyq qurylymdardyń shamadan tys kóbeıýine jáne baǵanyń kóterilýine ákeledi. Jyl saıyn 8 mıllıon tonnadan astam kókónis pen kartop jınalsa, kókónis qoımalarynyń jalpy syıymdylyǵy nebári 1,7 mıllıon tonnany qurady.

Prezıdenttiń sózine qaraǵanda, bul rette kókónis qoımalarynyń 60%-y tońazytqysh qondyrǵylarmen jabdyqtalmaǵan, saqtaý qoımalarynyń 30 paıyzynyń qyzmet etý merzimi 20 jyldan asqan.

Bul turǵyda Memleket basshysy Úkimet bul máseleni júıeli túrde sheshýi kerek ekenin tapsyrdy.

Osyǵan deıin keıingi bes jylda bıýdjetke 30 trıllıon teńge kem túskeni aıtyldy.