Prezıdent BAÁ Jasandy ıntellekt máseleleri jónindegi memlekettik mınıstrimen kezdesti
ASTANA. KAZINFORM — Memleket basshysy BAÁ Jasandy ıntellekt máseleleri jónindegi memlekettik mınıstrimen jáne Abý Dabı Densaýlyq saqtaý departamentiniń tóraǵasymen kezdesý ótkizdi. Bul týraly Aqorda málim etti.
Digital Bridge 2025 halyqaralyq forýmy alańynda Qasym-Jomart Toqaev Birikken Arab Ámirlikteriniń Jasandy ıntellekt, tsıfrlyq ekonomıka jáne qashyqtan jumys isteý máseleleri jónindegi memlekettik mınıstri Omar Ál-Olamamen jáne Abý Dabı Densaýlyq saqtaý departamentiniń tóraǵasy, G42 International kompanııasynyń bas dırektory Mansýr Ibragım ál-Mansýrımen kezdesti.
— Áńgimelesýde Qazaqstan men Ámirlikter arasynda jasandy ıntellekt salasyndaǵy yntymaqtastyqty keńeıtý perspektıvasy qarastyryldy. Memleket basshysy BAÁ jasandy ıntellekt tehnologııalaryn qoldaný jáne damytý isinde álemdik kóshbasshy sanalatynyn aıtty. Sonymen qatar birlesken kúsh-jigerdiń arqasynda ІT sektorynda birqatar mańyzdy jobalar iske asyrylǵanyna toqtalyp, áriptestikti odan ári nyǵaıtýǵa nıet tanytty. Qasym-Jomart Toqaev elimizde jasandy ıntellektige mamandanǵan ári ǵylymı zertteý men ázirlemelerge basymdyq beretin ýnıversıtet ashý josparymen bólisti. Osy oraıda álemdegi alǵashqy ІT ýnıversıtetti qurǵan BAÁ tájirıbesin zerdeleýdiń ózekti ekenin jetkizdi, — delingen habarlamada.
Kezdesýde Smart City birlesken jobasyna erekshe mán berildi. Búginde bul jumys bekitilgen josparǵa sáıkes júrgizilip jatyr. Prezıdenttiń aıtýynsha, atalǵan joba ekijaqty seriktestikti damytýdyń mańyzdy kezeńine jol ashady.
Eske sala keteıik, BAÁ Jasandy ıntellekt máseleleri jónindegi memlekettik mınıstri Omar Sultan Ál-Olama Kazinform tilshisine bergen eksklıýzıvti suhbatynda jańa JI mınıstrliginiń jumysyn memleket shyǵyndarynyń únemdelýimen baǵalaý kerek degen edi.
Aıta keteıik, Prezıdent Digital Bridge forýmynyń plenarlyq otyrysynda jasandy ıntellekt beıbit maqsatta ǵana qoldanylýǵa tıis ekenin aıtty.