Prezıdent BAÁ Qorǵanys isteri jónindegi memlekettik mınıstri Muhammed ben Mýbarak Fadel Ál-Mazrýıdi qabyldady
ASTANA. KAZINFORM - Memleket basshysy BAÁ Qorǵanys isteri jónindegi memlekettik mınıstri Muhammed ben Mýbarak Fadel Ál-Mazrýıdi qabyldady, dep habarlaıdy Aqordanyń baspasóz qyzmeti.
Kezdesýde eki eldiń qaýipsizdik jáne áskerı bilim berý salalaryndaǵy yntymaqtastyq perspektıvasy talqylandy.
Memleket basshysy Ámirlikterdiń qorǵanys ónerkásibindegi jetistikterine toqtaldy, sondaı-aq ozyq tehnologııa men ınnovatsııa baǵytyndaǵy tájirıbe almasý múmkindikterine nazar aýdardy.
Prezıdent Qazaqstan men Birikken Arab Ámirlikteriniń qarym-qatynasy qarqyndy damyp kele jatqanyn atap ótip, ekijaqty strategııalyq seriktestikti odan ári nyǵaıtýǵa daıyn ekenin aıtty.
Qorǵanys mınıstri Memleket basshysyna BAÁ Prezıdenti Muhamed ben Zaıd Ál Nahaıannyń jáne Premer-mınıstr, Dýbaı Ámirshisi Muhammed ben Rashıd Ál Maktýmnyń izgi sálemin jetkizdi.
Sondaı-aq bul sapar áskerı saladaǵy ózara yqpaldastyqty nyǵaıtýǵa tyń serpin beretinine senim bildirdi.
Osyǵan deıin Memleket basshysynyń Italııa Prezıdenti Serdjo Mattarellany elorda áýejaıynan shyǵaryp salǵany týraly jazdyq.