Prezıdent Azııa ınfraqurylymdyq ınvestıtsııalar banki prezıdentimen kezdesti
ASTANA. KAZINFORM – Memleket basshysy Azııa ınfraqurylymdyq ınvestıtsııalar bankiniń prezıdenti Tszın Lıtsıýnmen kezdesti, - dep habarlaıdy Aqorda.
Kezdesýde Qasym-Jomart Toqaev pen Tszın Lıtsıýn Qazaqstan men Azııa ınfraqurylymdyq ınvestıtsııalar banki (AIIB) arasyndaǵy yntymaqtastyqty damytý perspektıvasy jóninde pikir almasty.
Qazaqstan Prezıdenti AIIB basshysymen 2023 jyldyń mamyr aıynda Sıan qalasynda kezdeskenin, sodan beri ózara qarym-qatynas, ásirese, kólik, energetıka jáne densaýlyq saqtaý sekildi basty salalarda tyń serpin alǵanyn atap ótti.
Qasym-Jomart Toqaevtyń aıtýynsha, Qazaqstan bank qyzmetin keńeıtýge, atap aıtqanda, «jasyl» jáne zııatkerlik tehnologııalardy damytý jobalaryn ilgeriletýge arnalǵan aımaqtyq alańǵa aınalýǵa daıyn.
Búginde Azııa ınfraqurylymdyq ınvestıtsııalar banki elimizdegi strategııalyq mánge ıe jobalardyń birqataryna 2 mıllıard dollardan astam kólemde qarjy quıdy.
Sonyń ishinde Jambyl oblysyndaǵy iri jel elektr stansasy, Jezqazǵan – Qaraǵandy avtokólik joly, Kókshetaý qalasyndaǵy kópsalaly aýrýhana qurylysy bar.
Prezıdent buǵan deıin SNPC kompanııasy dırektorlar keńesiniń tóraǵasyn qabyldaǵan bolatyn.