Prezıdent: Ázerbaıjan men Armenııanyń bitimi Shyǵys pen Batysty jaqyndastyrady
BAKÝ. KAZINFORM — Memleket basshysy AÓSShK VII sammıti barysynda Ázerbaıjan men Armenııanyń bitimge kelý protsesine qoldaý bildirip, Ońtústik Kavkaz tájirıbesi kóregen kóshbasshylyqtyń nátıjesin aıqyn kórsetkenin aıtty, dep habarlaıdy Aqordanyń baspasóz qyzmeti.
— Ondaǵan jyldar boıǵy qaqtyǵystardan keıingi taraptardyń ymyraǵa kelýi jańa perspektıvaǵa jol ashyp, Shyǵys pen Batys arasynda baılanys ornatýǵa múmkindik berdi. Berik saıası erik-jigeri men zor ekonomıkalyq áleýeti bar AÓSShK iri transshekaralyq jobalardy júzege asyrýǵa eleýli úles qosa alady. Sondyqtan AÓSShK-niń kólik baılanysy strategııasyn birlese ázirleýdi usynamyn. Bul Strategııa óńirimizdegi «Bir beldeý, bir jol», Soltústik — Ońtústik halyqaralyq kólik dálizi, Orta dáliz jáne TRIPP bastamasyn qosa alǵanda, negizgi halyqaralyq kólik baǵyttarynyń áleýetin zerdeleýge múmkindik beredi, — dedi Prezıdent.
Qasym-Jomart Toqaev qazirgi tańda energetıka qaýipsizdigine qater tónip turǵanyn aıtty.
— Transshekaralyq energetıkalyq ınfraqurylym qaqtyǵystardyń zardabyn jıi tartyp otyr. Sonyń saldarynan álemdegi energetıka naryǵynda turaqsyzdyq beleń aldy. Bul boljaýsyz kezeń daǵdarys aımaǵynan tys elderdiń de ekonomıkalyq ósimin tejeýde. Dál osy sebepti elimiz seriktestikke den qoıyp otyr. Qazaqstan, Ázerbaıjan jáne Ózbekstan jasyl energııa jetkizý jónindegi strategııalyq seriktestik týraly kelisimge qol qoıdy. Osylaısha, Kaspıı jasyl energetıkalyq dáliziniń negizi qalandy. Bul elderimizdiń energetıkalyq júıelerin ózara baılanystyryp, Qara teńiz arqyly Eýropa naryqtaryna shyǵýǵa jol ashady, — dedi Memleket basshysy.
Buǵan deıin Toqaev preventıvti dıplomatııa tetigin iske qosýdy usyndy.
