Prezıdent azaptaý derekteri týraly: Shash al dese, bas alatyn áreketterge jol berýge bolmaıdy

NUR-SULTAN. QazAqparat – Memleket basshysy Qasym-Jomart Toqaev «QAZAQSTAN» telearnasyna bergen suhbatynda qańtar oqıǵalarynan keıingi azaptaý faktileri týraly pikir bildirdi, dep habarlaıdy QazAqparat.

«Adamdardyń quqyqtarynyń qorǵalýyna baılanysty jańa ǵana ózińiz aıtyp óttińiz. Endi osyǵan toqtalaıyq. Kúlbiltelemeı birden aıtsaq, bul azaptaý faktileri týraly. Mysaly úshin ózimiz de kórdik. Áleýmettik jelilerdegi vıdeolardy, jazbalardy saı-súıegiń syrqyrap qaraısyń. Ásirese arqasyna útik basylǵan taldyqorǵandyq Azamat Batyrbaev degen jigitke qatysty. Osydan habardarsyz ba?», - dep suraq qoıdy jýrnalıst Jaına Slambek.

Prezıdent bul másele jóninde jaqsy biletinin aıtty.

«Keıbir azamattarymyz meniń atyma beıne úndeý jazyp, áleýmettik jelilerde taratyp jatyr. Muny da bilip otyrmyn. Osyǵan baılanysty men Іshki ister mınıstrligi men Bas prokýratýraǵa arnaıy tapsyrma berdim. «Shash al dese, bas alatyn» áreketterge jol berýge bolmaıdy», - dep atap ótti Prezıdent.

Memleket basshysynyń aıtýynsha, qoǵamdyq komıssııalar óz jumysyna kirisip ketti. Adam quqyqtary jónindegi ýákil Elvıra Ázimova, belgili quqyq qorǵaýshylar: Aıman Omarova, Jemis Turmaǵambetova, Abzal Quspan jáne basqa da zańgerler jınalyp, arnaıy komıssııalar qurdy.

«Olar ár istiń zańdylyǵyn qarap jatyr. Qoǵamdyq komıssııalarǵa senimsizdik kórsetýge eshqandaı sebep te, haqymyz da joq. Bılik te, quqyq qorǵaý organdary da jumystaryna aralaspaıdy. Men de aralaspaımyn. Árbir quqyqbuzýshylyq deregi boıynsha sharalar qabyldanady. Kináli adamdar jazaǵa tartylady. Men úshin azamattarymyzdyń quqyǵy asa mańyzdy. Ásirese, qazirgi tańda muny eń mańyzdy másele dep aıtýǵa bolady. Árbir is boıynsha ádil sheshim shyǵarý men úshin negizgi prıntsıp bolyp tabylady», - dedi Q. Toqaev.