Prezıdent: Az halyqtardyń ana tilinde sóıleýine qurmetpen qaraý qajet

ASTANA. KAZINFORM – Memleket basshysy Qasym-Jomart Toqaev Astana halyqaralyq forýmynda Qazaqstan ustanyp otyrǵan «Birligimiz – áralýandyqta» qaǵıdatynyń mánin túsindirdi.

— Jahandyq qaýipsizdikke tóngen qaterge tek geosaıası sıpat turǵysynan qaramaý kerek. Muny moıyndaǵan jón. Álemdegi qazirgi ahýal ózgerip jatyr. Mýltılateralızmniń úni qumyqqanda, protektsıonızm órshıdi. Osynaý beı-bereket kezeńdegi bizdiń mindetimiz — yntymaqty qatań saqtaý, ydyraǵan tusyn qaıta qalpyna keltirý. Qazaqstan qazirgideı almaǵaıyp zamandy syndarly yqpaldastyq turǵysynan qarastyrady, — dedi Qasym-Jomart Toqaev.

Memleket basshysy Qazaqstan syrtqy saıasatta jikke bólinbeı dıalogqa kelýdi, kez kelgen eldiń egemendigin qurmetteýdi basshylyqqa alatynyn atap ótti.

— Ásireultshyldyq tanytyp, ózge halyqtardyń tarıhy men mádenı dástúrlerin mensinbeýge jol berilmeıdi. Az halyqtardyń ana tilinde sóılep, tól mádenıetin dáripteýine qurmetpen qaraý qajet. Sondyqtan Qazaqstanda «Birligimiz — áralýandyqta» qaǵıdatyn qatań ustanamyz. — dedi Prezıdent.

Aıta keteıik, elordada Memleket basshysy Qasym-Jomart Toqaevtyń qatysýymen Astana halyqaralyq forýmy ótip jatyr. 

Forýmǵa 7 000-nan astam qatysýshy tirkelgen. Eýropa, Ortalyq Azııa, Taıaý Shyǵys pen Afrıka elinen BUU, AAU, HKU jáne DZMU sııaqty jetekshi halyqaralyq uıymdardyń atynan 160-tan astam spıker shaqyrylǵan. Eki kún boıy olar túrli salanyń sarapshylarymen birlesip, memleketaralyq yntymaqtastyq modelin, jańa jahandyq áriptestik qurýdyń keleshegin talqylaıdy.

Buǵan deıin forýmnyń mártebeli meımandar qatarynda Rýanda Respýblıkasynyń Prezıdenti Pol Kagameni, Albanııa Premer-Mınıstri Edı Ramany, Horvatııa Respýblıkasynyń Premer-Mınıstri Andreı Plenkovıchti, Qatar Premer-Mınıstri — Syrtqy ister mınıstri sheıh Muhammed ben Abdýlrahman Ál Tánı bar ekeni habarlanǵan bolatyn.