Prezıdent aıtysqa qatysty óz oıyn bildirdi
ASTANA. QazAqparat - Qazaqstan halqy Assambleıasynyń XXV sessııasynda qoǵam qaıratkeri Júrsin Erman aıtys jaıynda oı qozǵady. Onyń aıtýynsha, aqyndar Prezıdentti jyrlaǵanda myńdaǵan halyq qoldaý bildiredi. Alaıda Memleket basshysy ondaı «tapsyrmalardy» unatpaıtynyn jetkizdi, dep habarlaıdy QazAqparat tilshisi.
«Keıde meniń qınalatynym, búkil Qazaqstan teledıdarynan otyrady da, ne dombyra tarta almaıdy, ne sóziniń qısyny kelmeıdi, ne áni joq. Menińshe, aıtystar aldymen oblystarda ótse, sol jerlerden jeńimpaz shyqsa, olardy tańdap, respýblıka boıynsha kórsetse, durys bolar edi. Kileń dúldúlder shyǵýy tıis. Onyń sózi ánine saı bolýy qajet. Áıtpese, sender Nazarbaevty maqtańdar dep tapsyrma beresińder, sodan ketti, keıde onyń ishinde neshe túrli báleler aıtylyp ketedi. Adam tyńdamaıtyn», - dedi Nazarbaev.
Aıta keteıik, óz sózinde Memleket basshysy Nursultan Nazarbaev Assambleıa múshelerine bir syryn aıtyp berdi. Budan bólek, Prezıdent memlekettiń damýyna kedergi jasaıtyn máseleler tóńireginde oı órbitti.
