Prezıdent aıtqan onkologııalyq ortalyq Astanada salynýy qajet -Dosqalıev
ASTANA. QazAqparat - Akademık Jaqsylyq Dosqalıev Memleket basshysy Nursultan Nazarbaevyń ǵylymı onkologııalyq ortalyqty qurý tapsyrmasyna qatysty pikir bildirdi, dep habarlaıdy QazAqparat tilshisi.
«Qazirgi kezde Almatyda onkologııalyq ǵylymı-zertteý ınstıtýty bar. Biraq búgingi zaman talabyna saı jabdyqtalǵan ǵylymı ortalyqty ashqan durys. Áli esimde, atalǵan bastama tórt-bes jyl buryn kóterilgen edi. Ortalyq arnaıy baǵdarlama aıasynda Astanada salynady degen jospar da boldy. Biraq nege ekenin bilmeımin, sol jaǵalaýda onkologııa jáne transplantologııa ulttyq ǵylymı ortalyǵy dep ashty», - dedi J.Dosqalıev QazAqparat tilshisine bergen suhbatynda.
Ǵalymnyń aıtýynsha, onkologııa ǵylymı ortalyǵyn bólek salǵan jón. Oǵan qoıylatyn talap ta joǵary bolýy qajet. Al, eń bastysy, ortalyqty zaman talabyna saı jabdyqtaý kerek.
«Qazir sáýlelik dıagnostıka, kıber-pyshaq, gamma-sáýle deıdi, osy ispetti qural-jabdyqtar qaterli isikke qarsy em-domdy sapaly túrde júrgizýge múmkindik beredi. Búginde onkologııalyq aýrýlar boıynsha dári-dármekter jetkilikti. Endi, tehnıkalyq jaǵyn kúsheıtýimiz kerek. Men oılaımyn, onkologııalyq ortalyqtyń bolǵany durys. Oǵan kórshi elderdiń azamattary kelip, emdele alady. Sóıtip, medıtsınalyq týrızmdi de damytamyz. Ótkende Baıgenjın Abaı Qabataıuly (ulttyq ǵylymı medıtsınalyq ortalyqtyń basshysy - avt.) Prezıdentpen kezdeskende osyny aıtyp, Astanada Úkimettiń qarajatyna emes, ınvestorlardyń aqshasyna salynsa degen usynys jasaǵan», - dep atap kórsetti J.Dosqalıev.
Aıta keteıik, Prezıdent Nursultan Nazarbaev bıylǵy Joldaýynda ǵylymı onkologııalyq ortalyqty qurý mindetin belgiledi. «Onkologııalyq aýrýlarmen kúresý úshin keshendi jospar qabyldap, ǵylymı onkologııalyq ortalyq qurý qajet», - delingen «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Memleket basshysynyń Joldaýynda.
