Prezıdent: Aımaqtyq depýtattar bıýdjetti bólýge tikeleı qatysady

— Búginde qoldanystaǵy zańnamalardy Konstıtýtsııa talaptaryna saı ózgertý jumysy júrgizilip jatyr. Aldaǵy ýaqytta Quryltaı saılaýy ótedi, Halyq keńesi qurylady. Qazir Parlament «Jergilikti memlekettik basqarý jáne ózin-ózi basqarý týraly» zańǵa túzetýler engizip jatyr. Bul ózgerister kúshine engen soń máslıhattardyń yqpaly artady. Aımaqtaǵy depýtattar bıýdjetti bólýge tikeleı aralasatyn bolady. Sonyń nátıjesinde oblystar men qalalardaǵy jergilikti ókildi bıliktiń baqylaý tetikteri kúsheıedi. Bul mańyzdy qadam aımaqtardyń derbestigin arttyra túsedi, — dedi Qasym-Jomart Toqaev.

Memleket basshysy Almaty oblysynyń ósip-órkendeýi úshin barlyq múmkindik bar ekenin aıtty. 

— Bárińizge málim, bıyl Qonaev qalasyna oblys ortalyǵy mártebesi berilgenine 4 jyl tolady. Shaharda aýqymdy jumys istelip jatyr. Qala birtindep ákimshilik, týrıstik jáne iskerlik ortalyq retinde qalyptasyp jatyr. Bul — ákim Marat Sultanǵazıevtiń eńbegi.

Jalpy, Almaty oblysynyń ósip-órkendeýi úshin barlyq múmkindik bar. Óńirge ınvestorlar nazar aýdara bastady.

Jalpy, Qonaev pen Alataý qalalarynyń damýy aımaqtyń kórkeıýine zor serpin bermek. Biz kúsh-jigerimizdi biriktirip, belsendi jumys istesek, barlyq maqsatqa jetemiz.

Búgingi jıynǵa aımaqtyń bedeldi, belgili azamattary qatysyp otyr. Sizder Almaty oblysynyń damýyna jáne elimizdiń órkendeýine mol úles qosyp kelesizder. Barshańyzǵa shynaıy rızashylyǵymdy bildiremin, — dedi Prezıdent. 

Keńeste Premer-mınıstrdiń orynbasary Qanat Bozymbaev Alataý qalasyn damytý maqsatynda Úkimet tarapynan qolǵa alynǵan sharalar týraly, Almaty oblysynyń ákimi Marat Sultanǵazıev aımaqtyń áleýmettik-ekonomıkalyq damýy jóninde baıandama jasady.

Prezıdent el damýyna eleýli úles qosqan birqatar azamatty memlekettik nagradalarmen marapattady.

Aıta ketelik Toqaev Alataýdyń áleýmettik ınfraqurylymyn kúsheıtýdi tapsyrǵan edi.