Prezıdent aımaqtardyń yqpaldastyǵyn jandandyrýdy ózekti máseleniń biri retinde atady

BІShKEK. KAZINFORM — Bul rette memleketter basshylary Aımaqaralyq forýmnyń kelesi otyrysyn kóp sozbaı ótkizýge kelisken. Bul týraly Aqordanyń baspasóz qyzmeti habarlady. 

Sonymen qatar kelissózder barysynda tsıfrlandyrý jáne elektrondyq úkimet salasyndaǵy yntymaqtastyq áleýeti talqylanǵan.

Taraptar ekonomıka salasyn tsıfrlandyrý úshin tájirıbe almasýǵa jáne aqparattyq baılanysty kúsheıtýge ýaǵdalasty.

Memleket basshysy sý-energetıka salasyndaǵy qarym-qatynasty úılestirý máselesine aıryqsha toqtaldy.

– Transshekaralyq sý resýrstaryn tıimdi paıdalaný aımaqtaǵy turaqtylyq pen ornyqty damýdyń mańyzdy faktoryna aınalyp otyr. Osy baǵyttaǵy yntymaqtastyqty jalǵastyrǵan jón dep sanaımyz. Biz barlyq kelisimdi múltiksiz oryndaýǵa jáne strategııalyq mańyzy bar birlesken jobalardy júzege asyrý úshin kúsh-jigerimizdi jumyldyrýǵa daıynbyz, – dedi Qasym-Jomart Toqaev. 

Qasym-Jomart Toqaev: «Kelissóz barysynda mádenı-gýmanıtarlyq qarym-qatynasty nyǵaıtýǵa basa mán berildi»

– Sońǵy jyldary rýhanı baılanysty jandandyrý úshin kóptegen is-shara atqaryldy. Byltyr Astanada qurmetti Prezıdentpen birge Aıkól Manastyń eskertkishin ashtyq. Búgin Bishkekte baýyrlastyǵymyzdyń taǵy bir nyshany – «Dostyqtyń altyn kópiri» eskertkishin ashamyz. Men muny qyrǵyz eliniń qazaq halqyna degen aıryqsha qurmeti dep bilemin. Qurmetti Prezıdentke jáne barsha qyrǵyz halqyna alǵys aıtamyn. Byltyr Qyrǵyzstan Prezıdentiniń Qazaqstanǵa sapary aıasynda eki eldiń jastaryn jaqyndastyra túsetin birqatar ýaǵdalastyqqa qol jetkizgen edik. Sonyń nátıjesinde Gýmılev atyndaǵy Eýrazııa ulttyq ýnıversıtetiniń Osh qalasyndaǵy fılıaly ashylýda. Budan bólek, Qazaqstan Úkimeti qyrǵyz stýdentterine 50 grant bólip otyr. Kelesi jyldan bastap grant sanyn 60-qa deıin kóbeıtemiz dep sheshtik. Kesheden beri Bishkekte Qazaqstannyń kıno kúnderi, Úshinshi jastar forýmy ótip jatyr. Munyń bári halqymyzdyń ǵasyrlar boıy qalyptasqan rýhanı baılanysyn nyǵaıta túsedi. Kezdesý barysynda týrızm jáne sport salasyndaǵy yntymaqtastyqty damytýǵa kóńil bólindi. Kelesi jyly Qyrǵyz elinde 6-shy Dúnıejúzilik kóshpendiler oıyndary ótedi. Dúbirli dodanyń tabysty ótýine tilektespiz, bizdiń jaqtan qoldaý kórsetýge daıynbyz, – dedi Memleket basshysy.

Aıta etelik Qasym-Jomart Toqaev pen Sadyr Japarov baspasóz brıfıngin ótkizdi.