Prezıdent: Áıelder men balalardy zorlyq-zombylyqtan qorǵaý – mańyzdy mindet

ASTANA. KAZINFORM – Otbasylyq zorlyq-zombylyqpen kúres jáne áıelder men balalardy qorǵaý – mańyzdy mindet. Bul týraly Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisinde málimdedi.

– Kelesi mańyzdy mindettiń biri – otbasylyq zorlyq-zombylyqpen kúres jáne áıelder men balalardy qorǵaý. Osy baǵytta zańnamalyq, ınstıtýtsıonaldyq turǵydan batyl qadamdar jasalýda. Otbasylyq zorlyq-zombylyq jasaǵany úshin beriletin jaza edáýir kúsheıtildi. Bir jyl buryn tıisti zań qabyldandy. Zańǵa engizilgen túzetýler men basqa da sharalar naqty nátıje bere bastady. Ortasha jáne aýyr deńgeıdegi otbasylyq-turmystyq qylmys sany jyl basynan beri 30 paıyzǵa tómendedi. Jalpy, sońǵy 5 jylda áıelderge qatysty quqyq buzýshylyqtar eki ese azaıdy. Eń bastysy, qazir qoǵamdyq sana túbegeıli ózgerip jatyr, - dedi Prezıdent.

Sonymen qatar Memleket basshysy azamattarymyzdyń boıynda otbasyndaǵy qatygezdik pen ozbyrlyqqa múldem tózbeýshilik qasıeti qalyptasyp jatqanyn atap ótti. Zardap shekkenderge qol ushyn beretin, al quqyq buzýshylardy jazǵyratyn qaıyrymdy qoǵam ornyǵyp keledi. Elimizde «Qazaqstan balalary» atty arnaıy baǵdarlama ázirlenip jatyr.

– Qujatta óskeleń urpaqtyń múddesin qorǵaýǵa arnalǵan mańyzdy tetikter usynylmaq. Nashaqorlyq pen esirtki bıznesine qarsy keshendi jumys atqarylyp jatyr. Bıyldyń ózinde 83 esirtki zerthanasy joıylyp, aınalymnan alynǵan esirtki zattarynyń kólemi 84 paıyzǵa ulǵaıdy. Esirtki óndirgeni úshin beriletin jaza qatańdatyldy. Tipti, ómir boıy bas bostandyǵynan aıyrylýy múmkin. Biraq bul saladaǵy jumys áli de tolyǵymen bitken joq, túıtkilder jetkilikti, sheshilmegen máseleler elimizdiń qaýipsizdigine, turaqtylyǵyna syn-qater tóndirýde. Búkil qoǵamdy alańdatyp otyrǵan eń qaýipti úrdis: jastar nashaqorlyqqa úıir bola bastady. Bul – úlken qater, ony jasyrmaýymyz kerek, - dedi Prezıdent.

Qasym-Jomart Toqaev Qazaqstanda kiristi jylystatýǵa jáne terrorızmdi qarjylandyrýǵa qarsy kúrestiń halyqaralyq ozyq standarttarǵa saı tıimdi júıesi qalyptasqanyn aıtty. 2019 jyldan beri JІÓ-degi kóleńkeli ekonomıkanyń úlesi 23 paıyzdan 16 paıyzǵa deıin tómendedi. Biraq áli joǵary deńgeı saqtalyp otyr.

– Memleket jaýapkershiligi mol ári adal kásipkerlerdi qorǵap, qoldaý bildiredi. Meniń arnaıy tapsyrmam boıynsha Bas prokýratýra jalpy somasy 34 trıllıon teńge bolatyn sheteldikterdiń qatysy bar júzdegen ınfraqurylymdyq jobaǵa quqyqtyq turǵydan kómek kórsetip keledi. Alaıda otandyq bıznesti negizsiz qylmystyq qýdalaý máselesi tolyq sheshimin tapqan joq. Bas prokýratýra bul jumysty jalǵastyrǵany jón, - dedi Memleket basshysy.

Aıta keteıik, Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisinde sóz sóıledi.