Prezıdent Áýlıetaý eteginde rámizder alańyn ashýdy tapsyrdy

ULYTAÝ. QazAqparat –Ulttyq quryltaıdyń alǵashqy otyrysynda Prezıdent Qasym-Jomart Toqaev Ulytaýdyń eteginde rámizder alańyn ashýdy usyndy, dep habarlaıdy QazAqparat tilshisi.

«Ulttyq quryltaıdyń Ulytaýǵa bastalǵany durys boldy. Kıeli ólkemiz Jańa Qazaqstandy qurý jolyndaǵy birliktiń sımvolyna aınaldy. Osy oraıda men taǵy bir mańyzdy bastama kótergim keledi. Bul jerde búkil rýlardyń tańbasy tasqa jazylǵan. Sol arqyly babalarymyz ult birligin kórsetken», - dedi Memleket basshysy.

Qasym-Jomart Toqaev Ulytaý jerindegi Tańbaly tastyń tarıhı róli týraly Qanysh Sátpaevtyń aıtqan qanatty sózin mysalǵa keltirdi.

«Qanysh Sátpaev «Elimizdiń tý tikken jeri – Tańbaly tas degen. Ókinishke qaraı, qasterli jazýlar keıin ábden búlindi. El azamattary Ulytaýǵa eskertkish qoıyp, tastaǵy tańbalardy jańǵyrtty. Biraq bul jetkiliksiz dep oılaımyn. Mundaı qazaqtyń birligin áıgileıtin sáýletti nysan turý kerek. Men Áýlıetaýdyń eteginde memlekettik rámizder alańyn ashýdy tapsyramyn. Qasıetti óńirde kók baıraǵymyz asqaqtap turýy tıis», - dedi Qasym-Jomart Toqaev.