Prezıdent aýyl sharýashylyǵy ónimderin áýe kóligimen tasymaldaý isin retteýdi tapsyrdy
ASTANA. KAZINFORM – Memleket basshysy aýyl sharýashylyǵy ónimderin syrtqy naryqqa úzdiksiz jetkizý úshin áýe tasymaldaý áleýetin belsendi qoldanýdy tapsyrdy. Bul týraly Aqordanyń baspasóz qyzmeti habarlady.
– Sarapshylardyń boljaýynsha, aldaǵy 10 jylda álemde mal etine suranys 233 mıllıon tonnaǵa deıin ulǵaıýy múmkin. Qazaqstan ettiń osy túrin eksporttaýshy iri elderdiń biri bola alady. Alǵashqy kezekte Azııa elderin qamtamasyz etýimiz kerek. Qoı etin eksporttaýda elimiz Mońǵolııa, Nıderland, Ispanııa jáne Frantsııa sııaqty memleketterden keıingi orynda tur. Biraq bizde jaıylymdyq jer jetkilikti. Qoı sharýashylyǵynyń eksporttyq áleýetin tolyq tanytý úshin jaǵdaı jasaý qajet. Joldaýda agrarlyq eksportty damytýdyń josparyn ázirleý jóninde mindet júktedim. Bul qujat logıstıkany, veterınarııalyq jáne fıtosanıtarııalyq standarttardy, sondaı-aq saýatty marketıngtik strategııany eskere otyryp daıyndalýy kerek. Máselen, Parsy shyǵanaǵy elderi bizdiń et ónimderin jyl boıy tasymaldaýǵa nıetti. Biraq bizde aýyl sharýashylyǵy ónimderin áýe kóligimen tasymaldaý isi durys úılestirilmegen ári tıisti deńgeıde rettelmegen. Kóp jaǵdaıda kásipkerler júkti jetkizý máselesin ózderi sheshýge májbúr.
Búgin maǵan turaqty reıstermen Ámirlikterge et jetkizile bastaǵany jóninde málimet berildi. Bul tájirıbeni asa durys dep aıta almaımyz. Sonymen qatar Astana, Almaty, Shymkent, Aqtóbe, Qaraǵandy, Aqtaý áýejaılary logıstıkasy damyǵan ári halyqaralyq áýe baǵyttarymen ıntegratsııalanǵan óńirlik habqa aınala alady. Olarǵa arnaıy ekonomıkalyq aımaqtar aıasynda artyqshylyqtar berilgen. Áýejaılardyń tolyq qýatynda jumys isteýi aýyl sharýashylyǵy ónimderin syrtqy naryqqa úzdiksiz jetkizýge múmkindik beredi. Bul máseleni Úkimet jan-jaqty pysyqtaýy kerek, - dedi Prezıdent Qasym-Jomart Toqaev.
Buǵan deıin Qasym-Jomart Toqaevtyń Aýyl sharýashylyǵy eńbekkerleriniń ekinshi forýmynda sóz sóılegenin jazǵanbyz.
Sondaı-aq Memleket basshysy agroónerkásip keshenindegi aqparattyq júıelerdi ıntegratsııalaýdy tapsyrdy. Sonymen qatar forýmda aýyl sharýashylyǵyna arnalǵan jeńildetilgen nesıe alǵash ret 1 trıllıon teńgeden asqany aıtyldy.