Prezıdent Aýyl sharýashylyǵy mınıstrine azyq-túlik qaýipsizdigin nyǵaıtýdy tapsyrdy
ASTANA. KAZINFORM – Qasym-Jomart Toqaev Aýyl sharýashylyǵy mınıstri Aıdarbek Saparovty qabyldady, dep habarlaıdy Aqorda.
Memleket basshysy bıylǵy birinshi jartyjyldyqtaǵy agroónerkásip kesheniniń damý qorytyndysy týraly esepti tyńdady.
Prezıdentke egistik alqaptaryn ártaraptandyrý, sharýalarǵa jeńildetilgen nesıe berý tetigin arttyrý, aýylsharýashylyq tehnıkalary lızıngin damytý jumystary jaıynda málimet berildi.
Aıdarbek Saparov agroónerkásip keshenindegi óńdelgen ónim kólemin 70 paıyzǵa deıin arttyrýǵa baǵyttalǵan sharalar qolǵa alynǵanyn baıandady.
2026 jyldyń alty aıynda taǵam ónimderin óndirý 14,7 paıyzǵa ulǵaıdy.
Aýyl sharýashylyǵynyń naqty kólem ındeksi 4,4 paıyzǵa, sonyń ishinde egin – 7,7 paıyzǵa, mal sharýashylyǵy 4,4 paıyzǵa ósti.
Sonymen qatar mınıstr eksport kólemi men shetelge shyǵarylatyn ónim túrleri de kóbeıip kele jatqanyn jetkizdi.
Bıylǵy qańtar-sáýir aılarynda AÓK ónimderiniń eksporty 3 mıllıard dollardy qurady, bul byltyrǵy sáıkes kezeń kórsetkishimen (2,2 mıllıard dollar) salystyrǵanda 36 paıyzǵa artyq.
Jyl sońyna qaraı eksport kólemin 7,2 mıllıard dollarǵa deıin ulǵaıtý josparlanǵan.
Memleket basshysynyń tapsyrmasyn oryndaý aıasynda qabyldanǵan Mal sharýashylyǵyn damytý jónindegi keshendi jospardyń júzege asyrylýy týraly aqparat berdi.
Barlyq sanattaǵy sharýashylyqtardy qamtıtyn jeńildikpen qarjylandyrý júıesi qalyptasty. Qabyldanǵan sharalar mal basyn kóbeıtýdi, salanyń ónimdiligin kóterýdi jáne et ónimderiniń eksportyn arttyrýdy kózdeıdi.
Jaıylymdyq mal sharýashylyǵyn ilgeriletýge erekshe nazar aýdarylyp otyr.
Prezıdent tapsyrmasyn oryndaý maqsatynda 2030 jylǵa deıin veterınarııany damytý jónindegi keshendi jospar bekitildi. Onyń aıasynda veterınarlyq qaýipsizdik júıesin jetildirý, salany qosymsha qarjylandyrý jáne normatıvtik-quqyqtyq bazany jańartý qarastyrylǵan.
Agroónerkásip keshenin tsıfrlyq turǵydan transformatsııalaý jalǵasýda. «E-AÓK» biryńǵaı tsıfrlyq platformasy bazasynda memlekettik aqparattyq júıeler men jańa tsıfrlyq servıster biriktirilip jatyr.
Boljamǵa sáıkes, jyl sońyna deıin aýyl sharýashylyǵyndaǵy jalpy ónim kólemi 5,9 paıyzǵa artady. Taǵam ónimderi óndirisin 9,5 paıyzǵa, sýsyn óndirisin 10,5 paıyzǵa ulǵaıtý kózdelgen. Saladaǵy negizgi kapıtalǵa 2,2 trıllıon teńge ınvestıtsııa salynbaq.
Prezıdent aýyl sharýashylyǵynyń tıimdiligin arttyrý, qosylǵan quny joǵary óndiristi jandandyrý, eksporttyq áleýetti keńeıtý jáne elimizdiń azyq-túlik qaýipsizdigin nyǵaıtý jóninde birqatar tapsyrma berdi.
Aıta keteıik, keshe Memleket basshysy Topyraqty qorǵaý týraly zańǵa qol qoıdy.
