Prezıdent aýyl sharýashylyǵy eńbekkerlerine rızashylyǵyn bildirdi

ASTANA. KAZINFORM — Memleket basshysy Qasym-Jomart Toqaev Aýyl sharýashylyǵy eńbekkerleriniń ekinshi forýmyna qatysyp jatyr.

Bul týraly Aqordanyń baspasóz qyzmeti habarlady. 

Qasym-Jomart Toqaev aýyl sharýashylyǵy eńbekkerlerine rızashylyǵyn bildirdi

— Eń aldymen, barsha aýyl sharýashylyǵy eńbekkerlerine kásibı merekelerińiz qutty bolsyn deımin. Bul shyn máninde, naǵyz eńbek adamdarynyń meıramy ekeni sózsiz. Dıqandar, mal sharýashylyǵy mamandary, sharýalar — bári de elimizdiń ósip-órkendeýine zor úles qosýda. Qajyrly eńbekterińiz úshin Sizderge shynaıy rızashylyǵymdy bildiremin, — dedi ol.

Aýyl sharýashylyǵy — ekonomıkamyzdyń strategııalyq máni aıryqsha salasy.

— Búgin, mine, aýyl sharýashylyǵyna arnalǵan ekinshi forýmdy ótkizip jatyrmyz. Alqaly jıynǵa aýyl-aımaqtardan kóptegen bilikti mamandar arnaıy kelip, qatysyp otyr. Sondyqtan búgingi forýmdy jalpyulttyq aýqymdaǵy basqosý deýge bolady. Jańa sóz sóılegen azamattar salmaqty oılaryn aıtty, usynystardy muqııat qarap, mindetti túrde eskerý qajet, — dedi Prezıdent. 

Aıta ketelik dástúrli jıynǵa 2 myńnan astam adam, sonyń ishinde aýyl sharýashylyǵy ónimin óndirýshiler, salalyq qaýymdastyqtar men halyqaralyq uıymdar ókilderi, ınvestorlar, ardagerler, sondaı-aq agrarlyq sala mamandyqtarynda oqyp jatqan stýdentter jınaldy.