Prezıdent: Aýyl sharýashylyǵy — biz úshin tabysty sala
ASTANA. KAZINFORM — Prezıdent Aqmola oblysyndaǵy aýyl sharýashylyǵy kásiporyndarynyń jetekshilerimen salanyń jaı-kúıi, sharýalardyń jetistikteri, sondaı-aq qordalanǵan máseleleri jóninde áńgimelesti.
Bul týraly Aqordanyń baspasóz qyzmeti habarlady.
Prezıdenttiń sózinshe, basty mindet — aýyl sharýashylyǵynda tereń óńdeý óndirisin damytý.
— Bıyl aýa raıy qolaıly. Úkimet qoldaý kórsetip otyr. Janar-jaǵarmaımen qamtamasyz etip, aldyn ala jeńildetilgen nesıe berýde. Astyq túsimi jaqsy bolady dep oılaımyz. Barshańyzǵa tabys tileımin. Joldaýda atap ótkenimdeı, basty mindet — aýyl sharýashylyǵynda tereń óńdeý óndirisin damytý. Byltyr aýyl sharýashylyǵyndaǵy ónim kólemi 8 trıllıon 250 mıllıard teńgeni qurady. Bul kóp te, az da emes. Óńirdegi basqa eldermen salystyrǵanda aýyl sharýashylyǵy jaqsy nátıjege qol jetkizdi. Biraq ishki jalpy ónim kólemine shaqqanda, bul 6 paıyz ǵana. ıAǵnı ekonomıkadaǵy aýyl sharýashylyǵynyń úlesin arttyrý qajet. Aýyl sharýashylyǵy — biz úshin tabysty sala. 12 mıllıon tonna bıdaı eksporttaý áleýeti — óte joǵary kórsetkish. Qazirdiń ózinde astyqty Eýropa elderi satyp alyp jatyr. Joldaýda aıtqanymdaı, astyqtyń alǵashqy legi, shamamen 15 myń tonna bıdaı Vetnamǵa joldandy, — dedi Memleket basshysy.
Qasym-Jomart Toqaev bıyl qarasha aıynda Aýyl sharýashylyǵy eńbekkerleriniń ekinshi forýmy ótetinin aıtty. Onda agroónerkásip keshenin damytý jáne memlekettik qoldaý máseleleri qarastyrylady.
Aıta keteıik, Memleket basshysy Aqmola oblysyna jumys saparymen barǵanyn jazǵan edik.
Osyǵan deıin Toqaev Aqmola oblysyndaǵy egin jınaý naýqanymen tanysty.