Prezıdent «Aýyl amanaty» baǵdarlamasynyń Aqtóbe oblysynda júzege asyrylý barysymen tanysty
Prezıdentke Aqtóbe oblysynda «Aýyl amanaty» baǵdarlamasynyń iske asyrylý barysy jóninde baıandaldy. Atalǵan bastama qolǵa alynǵaly beri óńir boıynsha 1471 jobaǵa 6,6 mıllıard teńge kóleminde nesıe berilgen. Sondaı-aq bıyl qyrkúıek aıynda qosymsha 12,5 mlrd teńge qarjy bólingen, dep habarlaıdy Kazinform.
Memleket basshysyna baǵdarlama aıasynda aımaqtaǵy 209,8 gektar alqapqa kókónis jáne baqsha daqyldary egilip, jalpy aýmaǵy 1 gektardan asatyn 77 shaǵyn jylyjaı salynǵany týraly aıtyldy.
Sonymen qatar 101 kondıterlik tseh pen naýbaıhana, 129 shaǵyn sút óńdeý, 65 et óńdeý jobasy iske qosylǵan.
Budan bólek, Aqtóbe oblysynda 1210 jańa jumys orny ashylyp, 1062 adam jeke kásipker retinde tirkelgen.
Bir ǵana Mártók aýdanynyń ózinde atalǵan baǵdarlama sheńberinde usynylǵan 195 jobaǵa 902,5 mıllıon teńge nesıe berilgen.
Qasym-Jomart Toqaev «Aýyl amanaty» baǵdarlamasy aıasynda iske asyrylǵan jobalarmen jáne aımaqtaǵy aýyl sharýashylyǵy taýaryn óndirýshilerdiń ónimderimen tanysqannan keıin jergilikti kásipkerlermen áńgimelesti.
Prezıdent aýyl turǵyndarynyń tabysyn arttyrý úshin «Aýyl amanaty» bastamasy qolǵa alynǵanyn aıtty.
Qasym-Jomart Toqaev jobanyń tıimdi tustaryn atap ótip, memleket sharýalarǵa, shaǵyn jáne orta bızneske barynsha qoldaý kórsetetinine nazar aýdardy.
