Prezıdent aýyl ákimdikteri qyzmetkerlerine jaǵdaı jasaýdyń mańyzyn atap ótti

ASTANA. KAZINFORM – Memleket basshysy aýyl ákimderi men aýyl ákimdikterinde qyzmet atqaratyn memlekettik qyzmetshilerdiń mártebesi men jumys jaǵdaıyn jaqsartý qajettigine nazar aýdardy.

«Memlekettik qyzmet júıesindegi aýyl ákimderiniń mártebesi týraly máseleni aınalyp óte almaımyz. Bul – óte ózekti dúnıe.

Atalǵan usynys buǵan deıin de birneshe ret kóterilgenin, tipti, Prezıdent Ákimshiligine tıisti ótinishter túskenin jaqsy bilemin. Memlekettik qyzmetshilerdiń sanattaryn naqty belgileý kerek. Úkimet Parlamentpen, Memlekettik qyzmet isteri agenttigimen osy máselelerdi jan-jaqty qarastyryp, bir aı ishinde ózderiniń usynys-pikirlerin berýge tıis. Sodan soń sheshim qabyldanady.

Aýyl ákimdikteriniń qyzmetkerlerin qoldaýǵa erekshe kóńil bólgen jón. Ákimdikterde, ásirese, aýyl ákimdikterinde buryn jumys istegen nemese qazir de eńbek etip júrgen azamattar muny memlekettik qyzmetshiniń naǵyz ómir mektebi dep beker aıtpaıdy. Bul barshaǵa túsinikti. Óıtkeni ákimdik qyzmetkerleri bılik pen buqara arasynda senimdi ári syndarly dıalog júrgizýdi meńgerip, naǵyz basqarý mashyǵyn jetildiredi.

Sol sebepti aýyl ákimdikteri qyzmetkerleriniń jumys isteýine, olardyń kásibı turǵydan ósýine jaǵdaı jasaý mańyzdy dep sanaımyn», – dedi Prezıdent.

Aıta keteıik, Memleket basshysynyń paıymynsha, aýyl ákimderi mindetti túrde bilikti maman bolýǵa tıis.