Qasym-Jomart Toqaev Aýǵanstan arqyly ótetin kólik dálizderin salý ıdeıasyna pikir bildirdi

ASTANA. KAZINFORM – Prezıdent Qasym-Jomart Toqaev «Egemen Qazaqstan» gazetine jarııalaǵan «Ortalyq Azııa renessansy: ornyqty damý jáne órkendeý joly» atty maqalasynda Aýǵanstan aýmaǵy arqyly ótetin kólik dálizderin qurý ıdeıasyna pikir bildirdi.

«Qazir Aýǵanstan aýmaǵy arqyly ótetin kólik dálizderin ashý qarastyrylyp jatyr. Bul qadam Ońtústik Azııa elderiniń áleýeti mol naryqtaryna jáne Úndi muhıtyndaǵy aılaqtarǵa shyǵýǵa jol ashady. Buǵan osy óńirdegi búkil el múddeli. Biz Ortalyq Azııanyń óz ishinde jáne odan tysqary eldermen kólik salasyndaǵy yntymaqtastyq aýqymyn keńeıtý arqyly kóptegen maqsatqa jete alamyz», - dep jazady avtor.

Memleket basshysy Ortalyq Azııa elderiniń yqpaldastyǵy kólik-logıstıka salasyn birge damytýdy qajet etetinin aıtady.

«Kólik qatynastaryn keshendi túrde jaqsartý (áýe reısteriniń jıiligin arttyrý, jańa áýe jáne temirjol baǵyttaryn iske qosý, shekaradaǵy ótkelderdi jańǵyrtý, t.b.), ınnovatsııalyq tehnologııalardy engize otyryp, kólik ınfraqurylymynyń qarqyndy damýyn qamtamasyz etý, tranzıt múmkindikterin keńeıtý jáne óńirdiń tranzıttik-logıstıkalyq áleýetin tıimdi paıdalaný máseleleri bolashaqta bizdiń elderimizdiń tranzıt-kólik salasyndaǵy yqpaldastyǵynyń negizgi baǵyttaryna aınalýǵa tıis», - deıdi Qasym-Jomart Toqaev.