Prezıdent áýejaı zalynda qurmetti qonaqtarmen az-kem áńgimelesti
ASTANA. KAZINFORM — Memleket basshysy Korol men Patshaıymnyń elimizge sapary Qazaqstan-Belgııa qarym-qatynasyn odan ári nyǵaıtý turǵysynan tarıhı mánge ıe ekenine nazar aýdardy.
— Qazaqstanǵa qosh keldińizder. Saparlaryńyz memleketimizdiń damýyndaǵy óte mańyzdy kezeńmen tuspa-tus kelip otyr. Jalpy, elimiz órkendep, ekonomıkasy ilgerilep keledi. Sizderdiń saparlaryńyz ekijaqty qarym-qatynasqa tyń serpin beredi dep aıtýǵa bolady, — dedi Prezıdent.
Korol Fılıpp qonaqjaılyq kórsetkeni úshin Prezıdent Qasym-Jomart Toqaevqa alǵys aıtyp, erteńgi joǵary deńgeıde ótetin kelissózder tabysty bolatynyna senim bildirdi. Sondaı-aq eki eldiń san qyrly seriktestigin tereńdetýdiń mańyzyn atap ótti.
— Ushaq trapynan qazaq jerine qadam basqan sátten bastap kórsetilgen syı-qurmet úshin Sizge alǵys aıtamyn. Úsh kúndik saparmen kelgenimizge qýanyshtymyz ári elińizben jaqynyraq tanysamyz dep senemin, — dedi Korol Fılıpp.
