Prezıdent Atyraý jáne Aqtóbe oblystary ákimderiniń esebin tyńdady
NUR-SULTAN. QazAqparat - Memleket basshysy Qasym-Jomart Toqaevqa Atyraý jáne Aqtóbe oblystarynyń ákimderi óńirlerde qalyptasqan qazirgi sanıtarlyq-epıdemıologııalyq jáne áleýmettik-ekonomıkalyq jaǵdaıdy telefon arqyly baıandady.
Bul týraly óziniń Facebook paraqshasynda QR Prezıdentiniń baspasóz hatshysy Berik Ýálı jazdy, dep habarlaıdy QazAqparat.
Atyraý oblysynyń ákimi Mahambet Dosmuhambetov Prezıdentke aımaq turǵyndaryna vaktsına salý barysy, iri ónerkásip kásiporyndarynyń suranysyna baılanysty vaktsına kólemin arttyrý qajettigi týyndap otyrǵany týraly aıtty.
Qasym-Jomart Toqaevqa oblystyń Úkimetpen birlese otyryp, damýdyń keshendi josparyn ázirleý jónindegi Memleket basshysynyń buǵan deıin bergen tapsyrmalarynyń oryndalý barysy týraly baıandaldy. Ákimniń aıtýynsha, atalǵan jospardyń iske asyrylýy oblystyń áleýmettik-ekonomıkalyq damýyna tyń serpin berip, jergilikti turǵyndardyń turmys sapasyn arttyrady.
Memleket basshysy Atyraý oblysynyń ákimine medıtsınalyq qyzmet kórsetý salasyndaǵy ózekti máselelerdi sheshý, sondaı-aq, mektepterdegi bilim berý sapasyn arttyrý jóninde birqatar tapsyrma berdi.
Aqtóbe oblysynyń ákimi Ońdasyn Orazalın Prezıdentke koronavırýs indetine qarsy kúres boıynsha qabyldanyp jatqan sharalar jaıynda esep berdi. Sonymen qatar Memleket basshysyna óńirdiń áleýmettik-ekonomıkalyq damýynyń negizgi kórsetkishteri, sonyń ishinde, ınvestıtsııa tartý, turǵyn úı salý, Indýstrııalandyrý kartasy aıasyndaǵy jobalardyń júzege asyrylýy jóninde baıandaldy.
Áńgimelesý sońynda Qasym-Jomart Toqaev Ońdasyn Orazalınge óńirdegi sanıtarlyq-epıdemıologııalyq ahýaldy turaqtandyrýǵa jáne azamattardy vaktsınalaý jumystaryn jandandyrýǵa qatysty birqatar tapsyrma berdi.
