Prezıdent Atyraý oblysynyń ákimine qandaı keńes berdi

ATYRAÝ. QazAqparat - Atyraý oblysy óńdeý sektoryna basa nazar aýdarýy qajet. Bul týraly Memleket basshysy Nursultan Nazarbaev Atyraý oblysynyń áleýmettik-ekonomıkalyq damý məseleleri jóninde keńeste aıtty, dep habarlaıdy QazAqparat tilshisi.

«Óńdeý sektoryna basa nazar aýdarý qajet jáne sol jaqqa ınvestıtsııany baǵyttaǵan jón. Al oblysta 2017 jyly aǵymdaǵy jylmen salystyrar bolsaq, mundaı ınvestıtsııa kólemi jarty esege qysqaryp ketken. Sondyqtan óńdeý ónerkásibine ınvestorlardy tartý óte qajet. Munaı-hımııa klasterin damytý kerek. Munaı-hımııa tehnologııasynyń qurylysyn aıaqtap, onyń aýmaǵynda men júrgizip jatqan saıasattyń arqasynda qazir propılen, polıetılen shyǵaratyn óndiristerdi iske qosaıyq dep jatyrmyz», - dep atap ótti Elbasy.

Memleket basshysy óziniń sheteldik saparlary barysynda ınvestorlardy elimizdiń óńdeý salasyna shaqyratyndyǵyn aıtty.

«Mysaly, biz óte kóp alıýmınıı shyǵaramyz. Ol qajet metall. Bizdiń boksıtimiz bar. Ony alıýmınıı retinde óńdemeı syrtqa satatynbyz. Qazir minekeı 250 myń tonna taza alıýmınıı shyǵaratyn boldyq. Taǵy da 250 myń tonna shyǵaraıyq dep jatyrmyz. Ol alıýmınııden neshe túrli zattar shyǵarý úshin ary qaraı óńdeý qajet. Biz dúnıede mysty eń kóp satatyn elmiz - 500 myń tonna. Mystan kabel de, ydys ta, barlyǵy da shyǵady. Sony jasaý kerek», -dedi Memleket basshysy.

Sonymen qatar Qazaqstan Prezıdenti Atyraý óńirinde polıpropılen óndirisin jolǵa qoıýǵa 2,6 mlrd dollar, polıetılenge 4,6 mlrd dollar jumsalatynyn eske saldy.

«Birinshisi bastaldy, ekinshisi bastalatyn bolady. Elimizdegi úsh munaı óńdeý zaýytyn da jańǵyrtýdy bitirdik. Sondyqtan bul salada úlken sharýa jasaldy. Ary qaraı júre berý kerek. Etanolǵa Sıngapýrdan 2 mlrd dollarǵa jýyq aqsha tartyp jatyrmyz. Farmatsevtıka zaýytyna 60 mln dollar, basqa da sharýalarǵa qarjy tartyp, oblysta óńdeý salasy kóbeıgen kezde túsetin qarjy da artady, elge de, oblysqa da jaqsy bolady. Sol sebepti osyǵan kóńil bólý kerek. Úkimetpen birge jumys isteýlerińiz kerek», - dedi Nursultan Nazarbaev oblys basshysy Nurlan Noǵaevqa qarata.

Elbasy munaı-gaz salasynda taýarlardy óndirý jáne qyzmet kórsetý múmkindikteri mol ekendigin atap ótti. Máselen, ótken jyly munaı-gaz sektorynda 3,3 trln teńge kóleminde satyp alý isindegi qazaqstandyqtardyń úlesi bir ǵana trln bolǵanyn eskertti.

«Bul ne degen sóz? Egerde osy zattardy Qazaqstannan satyp alatyn bolsa, ony jasaıtyn óndiristerdiń barlyǵy jumys isteıdi. Sol jerge bizdiń azamattarymyz ornalasyp, jalaqy alady, jaǵdaılaryn túzeıdi. Sondyqtan bizdiń úlken ınvestorlarǵa osy máseleni aıtyp otyrý qajet», - dedi Memleket basshysy.