Prezıdent Atyraý oblysy aýyldaryn 2 jyldyń ishinde taza aýyz sýmen qamtamasyz etýdi tapsyrdy

NUR-SULTAN. QazAqparat – Aldaǵy 2 jyldyń ishinde Atyraý oblysynyń barlyq aýyl turǵyndary sapaly aýyz sýmen qamtamasyz etilýi tıis. Bul týraly búgin Atyraý oblysynyń áleýmettik-ekonomıkalyq damý máseleleri jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Aýyldyq jerlerde sapaly aýyz sýǵa qoljetimdilikti qamtamasyz etýge qatysty problema áli kúnde deıin sheshilgen joq. Oblysta 30 aýyl nemese aýyldyq eldi mekenderdiń jalpy sanynyń 20 paıyzy tıisti sapadaǵy jáne tolyq kólemde aýyz sýmen qamtamasyz etilmegen», - dedi Qasym-Jomart Toqaev.

Memleket basshysynyń atap ótýinshe, bıyl óńirde tek 7 aýyldy ǵana aýyz sýmen qamtamasyz etý josparlanyp otyr.

«Bul óte tómen qarqyn. Úkimetke óńir ákimdigimen birlesip, 2 jyldyń ishinde bul máseleni tolyqtaı sheshýdi tapsyramyn», - dedi QR Prezıdenti.