Prezıdent atom salasyn damytýdyń 2050 jylǵa deıingi strategııasyn bekitti
ASTANA. KAZINFORM – Memleket basshysy Qazaqstannyń atom salasyn damytýdyń 2050 jylǵa deıingi strategııasyn bekitti.
QR Prezıdentiniń 2026 jylǵy 15 sáýirdegi №1233 Jarlyǵyna sáıkes qabyldanǵan qujat Atom energııasy jónindegi agenttik tarapynan ázirlengen. Strategııa atom energııasyn beıbit maqsatta paıdalaný salasyndaǵy memlekettik saıasattyń maqsattary men basym baǵyttaryn aıqyndaıtyn uzaq merzimdi baǵdarlamalyq qujat bolyp tabylady.
Qujat eldiń energetıkalyq qaýipsizdigin qamtamasyz etýge, ornyqty ekonomıkalyq ósýdi qoldaýǵa, halyqaralyq klımattyq mindettemelerdi oryndaýǵa, sondaı-aq joǵary tehnologııalyq óndiristerdi damytýǵa baǵyttalǵan. Sonymen qatar Qazaqstannyń jahandyq ıadrolyq saladaǵy ustanymyn nyǵaıtý kózdelgen.
– Strategııa atom energııasyn beıbit maqsatta paıdalaný salasyndaǵy memlekettik saıasattyń maqsattaryn, tásilderin jáne basym baǵyttaryn aıqyndaıtyn uzaq merzimdi baǵdarlamalyq qujat bolyp tabylady. Ol eldiń energetıkalyq qaýipsizdigin qamtamasyz etýge, ornyqty ekonomıkalyq ósýdi qoldaýǵa jáne joǵary tehnologııalyq óndiristerdi damytýǵa baǵyttalǵan, – delingen qujatta.
Strategııa aıasynda atom salasyn damytý segiz negizgi baǵyt boıynsha júzege asyrylady. Olardyń qatarynda atom elektr stantsııalaryn salý jáne qaýipsiz paıdalaný, ýran resýrstaryn tıimdi ıgerý, ıadrolyq ǵylym men tehnologııalardy damytý, radıoaktıvti qaldyqtarmen qaýipsiz jumys isteý, ıadrolyq qaýipsizdikti kúsheıtý, ulttyq óndiristi damytý, kadr daıarlaý jáne tsıfrlyq sheshimderdi engizý bar.
– Strategııany iske asyrý Qazaqstanda álemdik ıadrolyq ekojúıege ıntegratsııalanǵan zamanaýı jáne ornyqty ıadrolyq klasterdi qalyptastyrýǵa múmkindik beredi, – dep atap ótilgen.
Qujatqa sáıkes, 2050 jylǵa qaraı Qazaqstanda keminde úsh atom elektr stantsııasy jumys isteıdi. Qazirgi ýaqytta birinshi AES jobasyn iske asyrý bastalǵan, ekinshi stantsııa qurylysy qaralýda, al úshinshi AES úshin shaǵyn modýldik reaktorlar tehnologııalaryn qoldaný múmkindigi zerttelip jatyr.
– Bul qujat eldiń energetıkalyq jáne tehnologııalyq táýelsizdigin qamtamasyz etýdiń mańyzdy elementine aınalyp, ulttyq ekonomıkanyń básekege qabilettiligin arttyrýǵa negiz bolady, – delingen strategııada.
Aıta keteıik, buǵan deıin Qazaqstan atom energetıkasyn damytý úshin qandaı tehnologııa qoldanatyny habarlandy.
