Prezıdent Atyraý, Jambyl, Mańǵystaý jáne Ulytaý oblystary ákimderine tapsyrma berdi
ASTANA. KAZINFORM – Memleket basshysy Qasym-Jomart Toqaev telefon arqyly Atyraý, Jambyl, Mańǵystaý jáne Ulytaý oblystary ákimderiniń baıandamasyn tyńdady. Bul týraly Aqorda habarlady.
Ákimder Prezıdentke óńirlerdiń áleýmettik-ekonomıkalyq damýyna qatysty negizgi kórsetkishter men aldaǵy kezeńge arnalǵan josparlary týraly esep berdi. Sondaı-aq oblys jetekshileri Memleket basshysy tapsyrmalarynyń oryndalý barysy jóninde baıandady.
Qasym-Jomart Toqaev Serik Shápkenovke, Erbol Qarashókeevke, Nurdáýlet Qılybaıǵa jáne Dastan Ryspekovke aımaqtardy damytýdyń jańa tásilderi qajet ekenin eskertti.
Sonymen qatar oblystardyń ekonomıkalyq áleýetin arttyrý jáne azamattar múddesine qatysty áleýmettik máselelerdi sheshý úshin naqty sharalar qabyldaýdy tapsyrdy.
Prezıdent balalar men jasóspirimderge arnalǵan áleýmettik ınfraqurylym nysandarynyń, balalardy ońaltý ortalyqtarynyń, emhanalar men aýrýhanalardyń qurylysyn jedeldetý mindetin júktedi. Sondaı-aq «Taza Qazaqstan» qoǵamdyq-saıası aktsııasy aıasynda aýqymdy jumys júrgizý asa mańyzdy ekenin atap aıtty.
Qasym-Jomart Toqaev azamattarmen udaıy baılanysta bolyp, týyndaǵan túıtkilderdi ýaqtyly sheshý qajettigine aıryqsha nazar aýdardy. Budan bólek, óńir basshylaryna ekologııalyq ahýaldy baqylaýda ustaý, krımınogendik qubylystarmen, zańdy qasaqana buzý áreketterimen batyl túrde kúres júrgizý jóninde tapsyrma berildi.
Prezıdent Air Products bas atqarýshy dırektory Edýardo Menezespen kezdesý ótkizgen edi.
