Prezıdent atynan shahterlerge joǵary memlekettik nagradalar tapsyryldy
ASTANA. KAZINFORM — Shahter kúni qarsańynda Memleket basshysy Qasym-Jomart Toqaevtyń atynan Premer-mınıstr Oljas Bektenov kómir ónerkásibiniń ardagerleri men mamandaryn kásibı merekelerimen quttyqtap, memlekettik nagradalar tabys etti.
Úkimettiń baspasóz qyzmetiniń málimetine sáıkes Qazaqstan mıneraldyq resýrstardyń eń iri qory bar on memlekettiń qataryna kiredi. Elimizdegi kómir qory 34 mlrd tonnaǵa baǵalanady, bul álemdik resýrstardyń 4%-yn quraıdy. 2025 jyldyń jeti aıynda Qazaqstan ekonomıkasy 6,3%-ǵa ósti. Bul rette taý-ken ónerkásibi 8,5%-dyq joǵary ósý qarqynyn kórsetti, kómir óndirý 10,6%-ǵa ósti. Búgingi tańda salada 145 myńnan astam azamat qyzmet etedi, onyń 32 myńy kómir ónerkásibinde.
— Memleket basshysy jarııalaǵan bıylǵy «Jumysshy mamandyqtary jyly» aıasynda shahterler men kenshiler eńbegine erekshe kóńil bólinip otyr. Ǵasyrlar boıy bul mamandyq eń kúrdeli jáne mańyzdy mamandyqtardyń biri bolyp otyr. Sizderdiń tabandylyqtaryńyz ben tózimdilikterińiz, eńbekqorlyqtaryńyz ben adaldyqtaryńyz qurmet pen maqtaýǵa laıyq. Eńbek adamyn jan-jaqty qoldaý, óndiriste qaýipsiz jaǵdaılardy qamtamasyz etý — memlekettiń basty basymdyǵy. Ol maqsatta elimizdegi shahtalar óndiristik qaýip-qaterlerdi tómendetýge múmkindik beretin tsıfrlyq júıelermen jaraqtandyrylyp jatyr. Pılotsyz tehnıka, qashyqtan basqarý jáne jerasty radıobaılanysy engizilip keledi. Bul jumystar jalǵasa bermek, — dep atap ótti Premer-mınıstr.
Oljas Bektenov taý-ken ónerkásibi óziniń strategııalyq mańyzyn saqtap qala beretinin atap ótti. Sırek jáne jerde sırek kezdesetin metaldardyń ken ornyn ıgerý elimizdiń damýyna qosymsha serpin berip, shahter mamandyǵynyń mańyzyn naqtylaı túsedi.
Shahterler men kenshiler Memleket basshysyna jumysshy mamandyqtaryna kóńil bólip kele jatqany úshin alǵys bildirdi.
— Búgin elimizde eleýli mereke bolyp jatyr. Osy Shahter kúnimen kenshilerdi quttyqtaımyn. Meniń bul saladaǵy jalpy eńbek ótilim qyryq jylǵa jýyq. Kenshilerdiń jumysy jemisti, qaýipsiz bolsyn dep tileımin. Eńbegimizdi baǵalap, marapattap jatqan Memleket basshysyna zor alǵysymdy bildiremin, — deıdi «Qazaqmys korporatsııasy» JShS fılıaly — «Qaraǵandytústimet» ÓB «Nurqazǵan» kenishiniń dırektory Muqan Úngitbaev.
Joǵary memlekettik nagradaǵa ıe bolǵandardyń qýanyshynda shek joq. Olar bul marapattar kenshilerdiń eńbegine, tózimdiligi men janqııarlyǵyna berilgen joǵary baǵa dep esepteıdi.
— Taý-ken óndirisine 1996 jyly keldim. Sodan beri 28 jyldyń júzi bolypty. Búgin eńbegimiz elenip, joǵary memlekettik maprapat alyp jatqanyma alǵysymdy aıtamyn. Kele jatqan kásibı merekemiz qutty bolsyn! Otbasylaryńyzǵa amandyq, jaqsylyq tileımin. Qýanyshty kúnderińiz kóp bolsyn, — deıdi «Qazaqmys korporatsııasy» JShS fılıaly — Q.I. Sátbaev atyndaǵy «Jezqazǵantústimet» ÓB-niń úńgileýshisi Erbol Esetov.
Kenshiler qaýymy taý-ken salasy, sonyń ishinde, kómir óndirý kásibi óte úlken oń ózgeristerge úshyrap jatqanyn aıtady. Salada qaıta jańǵyrtý júrip, óndiristiń qarqynyn arttyrý máseleleri sheshimin taýyp keledi.
— Men Memleket basshysyna, bizdiń kompanııanyń basshylyǵyna meniń eńbegimdi laıyq baǵalap, joǵary nagradaǵa usynǵany úshin rahmetimdi aıtamyn. Bul tek maǵan ǵana emes, ujymyma, áriptesterime berilgen baǵa dep bilemin. Ózim kómir ónerkásibinde 40 jyldan astam ýaqyt qyzmet etip kelemin. Eńbek jolymdy taý-ken sheberi bolyp bastap, departament dırektory qyzmetine deıin kóterildim. Bul mamandyqty jastaıymnan tańdadym, mektep bitirgen soń polıtehnıkalyq ınstıtýtqa oqýǵa tústim. Sodan bergi aralyqta, taý-ken salasy, sonyń ishinde, kómir óndirý kásibi óte úlken tabystarǵa qol jetkizdi. Qaıta jańǵyrtý júrip jatyr, qaýipsizdik máseleleri, óndiristiń qarqynyn arttyrý máseleleri sheshimin tabýda. Bul ózgeristerde úlken ujymnyń ushan-teńiz eńbegi jatyr. Osyǵan oraı barsha shahterlerdi búgingi kásibı merekemen quttyqtap, zor densaýlyq, yrys-bereke tileımin», — deıdi «Qarmet» AQ Kómir departamentiniń óndiris jónindegi dırektory Tólegen Shaıahmetov.
Kómir jáne taý-ken salasyn damytýǵa qosqan úlesi úshin erekshe kózge túsken qyzmetkerlerge memlekettik nagradalar men qurmetti ataqtar tabys etildi.
Osyǵan deıin Májilis depýtattary Qaraǵandy shahterlerimen eńbek adamdaryn qoldaý jaıyn talqylady.